Süriyä balaları belem aludan mäxrüm

Üzäge Angliyada urnaşqan “Balalarnı saqlaw” oyışması äzerlägän xisap dürtençe yılına kergän suğışnıñ ber buınnı rätle räweştä belem aludan mäxrüm itüenä iğtibarnı yünältte.

Süriyä balalarınıñ uqudan mäxrüm buluınıñ buınnar buyı däwam itäçäk näticälär tudıra alaçağı kisätüe yasalğan xisapta: “Süriyädä yaqınça 3 meñ 465 mäktäp cimerelgän yäki zarar kürgän. Qayber mäktäplär äle dä xärbi maqsatlarda qullanıla. Mäktäplärneñ biştä berse qullanıla alınmıy. Kürşe illärgä kitärgä mäcbür bulğan 1 million yarım qaçaq balanıñ barı tik yartısı ğına mäktäpkä bara ala. Süriyädäge watandaşlar suğışı arqasında 3 million bala mäktäpkä yöri almıy”, - dip äytelde.

Berläşkän Millätlär Oyışması mäğlümatlärenä kürä, ildäge watandaşlar suğışı näticäsendä kim digändä 190 meñ keşeneñ ğomere özelgän, 3 million keşe dä illären taşlap kitkän.