Dönyada İzrailgä rizasızlıq belderelä

İzrailneñ Ğazzädä yasağan keşelek cinayätlärenä dönyadan reaktsiya belderelä.

Fälästindä Ğazzä operatsiyäse protestı

Ğazzä höcümnäreneñ berençe könennän birle Fälästindä rizasızlıq cıyınnarı tuqtamıy.

Bäytüllahimdä oyıştırılğan uram cıyınnarında İzrail xärbiläre belän fälästinlelär arasında bäreleşlär kilep çıqtı.

İzrail xärbiläre açqan ut näticäsendä ber fälästinle häläq buldı.

Kaliforniyalılar Obamanı protest belän qarşıladı

Amerika Quşma Ştatlarınıñ Kaliforniya ştatında İzrail küpläp üterülärenä rizasızlıq belderüçelär tawışların İlbaşı Obamağa işetterergä tırıştı.

Oçqıç belän Kaliforniyağa kitkän Obamanı avtoyul buyında yaqınça yöz keşelek törkem "Ğazzäne saqlağız”, “Cinayätlärne tuqtatığız” yazuları belän qarşı aldı.

Angliyada BBCneñ Ğazzä tapşıruları iğtibar üzägendä ide

Angliyada rizasızlıq cıyınnarınıñ adresı başqala Londondağı İzrail ilçelege ide.

Yähüd din ähelläre dä yaqlap çıqqan mitingta Könbatış illäreneñ İzrail yaqlı totışı häm BBC teleradiokompaniyäseneñ waqiğalarnı yaqtırtu säyäsäte kisken räweştä gäyeplände.

Uram cıyınında Ğazzädä yäşängän faciğägä zur reaktsiya bar ide.

Yähüd din ähelläre "Böten fälästinlelär ilenä qaytsın”, "Sionizm – yähüdilek tügel” yazuların kütärde.

Germaniya häm Gretsiyada protestlar

Germaniya başqalası Berlindä yözlärçä keşe Ğazzägä yaqlaw öçen cıyıldı.

İzrail höcümnärendä ğomerläre özelgän balalarğa iğtibarnı cälep itü öçen şaqtıy keşe käfen kiyderelgän uyınçıq bäbilär belän rizasızlıq çarasında qatnaştı.

Gretsiyädä protestçılar başqala Afinadağı Berläşkän Millätlär Oyışması binası aldında cıyıldı.
Rizasızlıq cıyını waqıtında Ğazzädä yasalğan cinayätlärgä iğtibarsız qalğan Berläşkän Millätlär Oyışmasına qarşı şiğarlär äytelde.

Tönyaq Kiprda İzrail protestı

İzrailneñ Ğazzägä qarşı höcümnäre Tönyaq Kipr Törek Cömhüriyäte başqalası Lefkoşada protest itelde.

Ğazzädä häläq bulğan fälästinlelär öçen öç könlek matäm iğlan itelgän Tönyaq Kipr Törek Cömhüriyätendä bayraqlar yartılaş töşerelde.