Ğiraq xalqı çärşämbe könne ärcä başına bar

Ğiraqta xalıq Saddam Xösäyenneñ bärep töşerelüennän birle 4nçe tapqır ärcä başına bara.

9meñnän artıq namzätneñ 328 äğzale parlament öçen yarışaçaq saylawlarda 21 million 400 meñ saylawçı tawış biräçäk.

Äl-Kaidegä bäyle törkemnär kontrolendäge Anbar vilayätendä isä saylawlar uzmayaçaq.

Saylawlarda qatnaşuçı zur partiyalärdän 2ese şiğıy, 3ese sönni, berse körd törkemneke.

Sayalwlarda 2 çor buyı premyer-ministr wazifasın başqarğan Nuri Äl-Maliki citäklägän Şiğıy blokınıñ mäclestäge 328 urınnan 100en qazanaçağı çamalana.

Läkin haman da 2 zur şähärneñ terror oyışmaları kontrolendä buluı Malikine awır xäldä qaldıraçaq kebek.
Saylawlardan alda tığız iminlek çaraları kürelde.

İldä ber atnalık yal iğlan itelde.

Ğiraq hawa zonası da çärşämbe kiçkä qadär yabıq bulaçaq.

Barlıq iminlek çaralarına qaramastan Bagdatnıñ tönyaq könçığışındağı Saadiyä şähärçegendäge ber bazar urınında barlıqqa kilgän şartlawlarda 17 keşeneñ ğomere özelde, 42 keşe yaralandı.