Awrupa Berlegennän Rusiyägä çikläwlär
“Qara isemlekkä” Mäskäw citäkçelegenä yaqın qayber zatlar östäläçäk
Ukrainada kiyerenkelekne arttırırğa däwam itüçe Rusiyä Federatsiyäsenä qarşı Könbatış dönyası yaña adımnar yasarğa cıyına.
G7 äğzase illärneñ "Rusiyä Jenevadağı kileşü qısalarında anıq ber adım yasamadı" belderüennän soñ Awrupa Berlege dä Mäskäw citäkçelegenä qarşı sanktsiyälärne kiñäytü öçen berençe adımın yasarğa äzerlänä.
Bryusseldä cıyılğan Awrupa Berlege diplomatlarınıñ mölkät-milege tuñdırılğan räsmi zatlar isemlegen kiñäytäçäge belderelä.
Awrupa Berlege xäzerge waqıtta 33 Rusiyä häm Qırım räsmi zatın qara isemlekkä alğan wazğiyättä.
Soñğı sanktsiya dulqınında isä bu isemlekkä Ukrainada kiyerenkelekneñ artuınnan cawaplı häm Mäskäw citäkçelegenä yaqın tağın 15 yaña isemneñ östälüe kötelä.
Yaña sanktsiya qararları isemnäre Awrupa Berlege räsmi gazetında çıqqannan soñ ğämälgä keräçäk.
