Dön’ya matbuğatına küzätü 04.06.2021

İspaniyaneñ “El Pais” basması beldergänçä barlıq illärdän 7 iyun’nän başlap çikläwsez İspaniyağa kerä alu öçen kiräkle şart – kim digändä 14 kön aldan koronavirus vakŝinasın yasatu.

Şul uq ildä dön’ya kürüçe “El Mundo” gazetı Kolumbiya ilbaşınıñ süzlären citkerä: “Kolumbiyağa vandalizm häm terrorçılıq zıyan sala.”

“Elraya” basması yazğança Rusiyädä här yıl oyıştırıluçı Sankt Peterburg Xalıqara İqtisad forumı Rusiyä belän xezmättäşlek öçen yaña ofıqlar aça.

“Eldustour” gazetı citkergänçä Yordaniya-Misır-Franŝiya Fälästin cirlärenä häm Ğazzägä yärdämneñ koordinaŝiyalänüe belän bäyle açıqlaw yasadı.

“Elqudus Elarabi” basması Vaşington citäkçelege açıqlawına urın birä: “Xökümät üzgäreşenä qaramıyça İzrailne xuplaw däwam itäçäk.”

Alman telendäge Zeit.de xäbär säxifäse yazğança Rusiyädän alman hawa yulı Luftansa oçqıçlarına qabat utıru röxsät birelde.

“Le Figaro” gazetı beldergänçä dön’yada 2 milliard Kovid-19 vakŝinası yasaldı.

“Le Monde” basması xäbärenä kürä Franŝiya Mali belän ike yaqlı xärbi xezmättäşlekne tuqtattı.

France 24 televideniyese citkergänçä Franŝiyada 15 iyun’nän başlap 12-18 yäş’täge balalarğa vakŝina yasalaçaq.

TASS agentlığı beldergänçä utırğan oçqıçı Minskta töşerelep, qulğa alınğan Belarus’le jurnalist Roman Protaseviç mäxkämädä cämğıyät’ xozurın bozuğa qarağan röxsätsez çara oyıştıru ğayeben qabul itte.

RİA Novosti xäbär agentlığı yazğança Rusiyäneñ Turıdan investiŝiya fondı Awrupa Daru agentlığı belgeçläreneñ Sputnik V vakŝinasın citeşterü şartların tikşerüen häm vakŝinağa qarşı alıp barıluçı yalğış xäbär kampaniyasenä qaramastan älegä citdi tänqıyt’ işetmäwlären belderde.

Lenta.ru xäbär säxifäse citkergänçä Kreml’ süzçese Dmitri Peskov Rusiyä ilbaşı Vladimir Putin häm AQŞ däwlät başlığı Djo Baydennıñ 16 iyun’ könne kötelgän söyläşüdän küp närsä kötmäw zarurlığın äytte.

Tatar-inform mäğlümat agentlığı xäbär itkänçä Tatarstanda tağın 31 keşe koronavirus yoqtırğan. Soñğı täwlektä belgeçlär 7900 PŜR-test ütkärgän.