Dön’ya matbuğatına küzätü 25.05.2021

Euronews kanalı citkergänçä, Belarus’nıñ Ryanair oçqıçın utırırğa mäcbür itep andağı oppoziśioner jurnalistnı qulğa aluı Awrupada kisken tänqıyt’kä totıldı.

Germaniyäneñ “Deutsche Welle” gazetı DEAŞnıñ bomba yasaw belgeçeneñ İstanbulda êläkterelüe xaqında yaza.

“Berliner Zeitung” gazetı Bötendön’ya sälamätlek saqlaw oyışmasınıñ koronavirus kizüendä kimendä 115 meñ mediśina xezmätkäre ülüe xaqındağı mäğ’lümatları belän urtaqlaşa.

Ğaräp telle gazetlardan “Al-Quds Al-Arabi” xäbär itkänçä, AQŞ däwlät särqatibe Êntoni Blinken İzrail belän Ğazzä arasındağı solıxnı nığıtu öçen Tel’-Avivqa kilde.

Şul uq “Al-Quds Al-Arabi” gazetı Ramallax şähäre yanında İzrail köçläreneñ ber fälästinlene atıp üterüe turında yaza.

Franśiyäneñ “France 24” kanalı Bötendön’ya sälamätlek saqlaw oyışmasınıñ vakśina taratudağı tigezsezlekne tänqıyt’läwen citkerä.

Franśiyäneñ “Le Figaro” gazetı yazğança,  Air France aviaşirkäte Belarus’ hawa kiñlegen qullanıp başqarıluçı oçışların tuqtatıp toruın belderde.

Rus telendäge Lenta. ru säxifäse xäbär itkänçä, Belarus’ däwläte başlığı Aleksandr Lukaşenko oçqıç skandalı häm oppoziśioner Telegram kanalı NEXTAnıñ xucası Roman Protaşeviçnıñ qulğa alınuınnan soñ Rusiyä ilbaşı Vladimir Putin belän Mäskäwdä oçraşaçaq.

“Komsomolskaya Pravda” gazetı Belarus’ hawa yulı şirkätläre oçqıçlarınıñ Awrupa Berlege östennän oçuı tıyıluın citkerä.

“Ria Novosti” agentlığı xäbär itkänçä, Rusiyä xökümäte İslandiya, Mal’ta, Meksika, Portugaliya häm Soğud Ğaräbstanına oçışlarnı aça.

“Tatar-inform” mäğ’lümat agentlığı yazğança, Tatarstan ilbaşı Röstäm Miñnexanov 175nçe mäktäptäge faciğada ülgän balalarnıñ äti-äniläre belän oçraştı.