Dön’ya matbuğatına küzätü 24.05.2021

France 24 televideniyese citkergänçä Parijda oyıştırılğan Fälästin yaqlı protest çarasında tübändäge şiğar’ äytelde: “Franŝiya - İzrailneñ cinayät’täge partnyerı.”

Franŝuz telendäge “Le Monde” basması beldergänçä Ğazzädä yaña suğışnı buldırmıy qalu öçen ike xalıqqa da tiñ xoquq täêmin itüçe yaña totış kiräk.

Yordaniyaneñ “el-Düstur” gazetı yazğança İzrailneñ xoquq bozuları utnı tuqtatu tırışlıqlarına zıyan saldı.

Angliyada basıluçı bäysez ğaräp gazetı “el-Quds el-Arabi” xäbär itkänçä Aljirlı futbolçı Riyad Maxrez uynağan taqımı Mançester Siti çempionlıknı qotlağan waqıtta Fälästin bayrağın kütärde.  

Qatarda dön’ya kürüçe “el-Raye el-Qatariyye” basması citkergänçä yähüd bistälärendä yäşäwçelär Äl-Aqsa mäçetenä qabat basıp kerde.

Alman telendäge Bild.de xäbär säxifäse yazğança İtaliyaneñ tön’yağındağı funikuler qazasında 14 keşeneñ ğomere özelde. Faciğada qorıçtan yasalğan arqannıñ özelüe uylanıla.

Ard.de internet säxifäse beldergänçä Awrupa Berlege illäre çirattan tış cıyıla. Oçraşuda Rusiyä häm Belarus mäs’äläläre qaralaçaq.

Deutsche Welle media oyışması xäbärenä kürä ütkärelgän ber tikşerenü BionTech häm AstraZeneka vakŝinalarınıñ hind koronavirusına qarşı täêsirle buluın kürsätte.

İspaniyada basıluçı “El Pais” gazetı citkergänçä İspaniya reanimaŝiyalärendä wazğıyat’ normal’läşä. İldä koronavirus oçraqları bu ayda 28%ka kimede.

RİA Novosti agentlığı xäbär itkänçä Yaponiyaneñ Kyodo agentlığı Sovetlar Berlegeneñ Kuril’ utrawlarınıñ ber öleşen Yaponiyağa birü planlarına qarağan dokumentlarnı açıqladı.

Rus telendäge Lenta.ru internet säxifäse yazğança Rusiyädä xalıq ışanıçlıları Däwlät Dumasına tabiblarnı mısqıllawğa cinayät’ cawaplılığı kiterüne täqdim itüçe qanun ölgesen tapşırdı.

“Tatar-inform” mäğlümat agentlığı beldergänçä Törkiyä Rusiyägä kurort töbäklärenä oçışlarnı yañadan başlatırğa täqdim itte.