Dön’ya matbuğatına küzätü 27.04.2021

Germaniyäneñ ard.de säxifäse Awrupa Berlegeneñ vakśina alu kileşülären bozuı säbäple AstraZeneka şirkätenä qarşı däğ’wa açuın citkerä.

Nemeś telendäge “Deutsche Welle” gazetı yazğança, Parijda oçraşqan Germaniyä häm Franśiyä ilbaşları Ştaynmayer belän Makron koronavirus kizüendä awır çor kiçerüçe Awrupanıñ aşığıç räweştä berläşüe kiräklegen söyläşte.

zdf.de säxifäse Hindstanda koronavirus yoqtıru oçraqlarınıñ 5 kön rättän 300 meñnän artıp rekord yasawın citkerä.

Ğaräp basmalarınnan “el-Quds el-Arabi” gazetı yazğança, Germaniyädä ıruğçı keşeneñ poyızdda süriyäle yäşüsmergä höcüm itüe açu qabarttı.

“el-Raye el-Qatariyye” gazetı xäbär itkänçä, Katar Soğud Ğaräbstanınıñ iminlegen häm totrıqlılığın köçäytüen yaqlıy.

Franśiyäneñ “Le Parisien” gazetı ilgä koronavirusnıñ Hindstan variantı ütep kerüenä yul quymaw öçen çik buylarında kontrol’neñ arttırıluın belderä.

Şul uq ilneñ “Le Figaro” gazetı Franśiyäneñ Hindstanğa kislorod caylanmaların cibäräçägen yaza.

Şveyśariyäneñ “Le Temps” gazetı citkergänçä, layıqlı yaldağı xärbilär Franśiyä ilbaşı Êmmanuêl’ Makronğa xat yazıp ildä tüntäreleş şöbhäsen qabat uyattı.

İspaniyäneñ ABC kanalı xäbärenä qarağanda, Peru ğalimnäre koronavirusnıñ üz illäre yäisä Çilidan çıqqanğa oxşağan häm başqa däwlätlärdä dä taralğan bulırğa mömkin yaña variantın tikşerä.

Rusiyäneñ TASS agentlığı citkergänçä, Franśiyä ilbaşı Êmmanuêl’ Makron telefon aşa äñgämä waqıtında Rusiyä däwlät başlığı Vladimir Putinğa Ukraina liderı Vladimir Zelenskiy belän Parijdağı söyläşüen añlattı.

Rus telendäge “Kommersant” gazetı yazğança, Rusiyä 1nçe maydan Hindstanğa koronavirusqa qarşı Sputnik V vakśinasın êksportlıy başlıy.

Tatarstannıñ “Tatar-inform” mäğ’lümat agentlığı Törkiyädä Sadri Maqsudinıñ qızı Ädilä Aydanıñ êtrusklar turındağı kitabınıñ qabat basıluı xaqında citkerä.