Dön’ya matbuğatına küzätü 11.03.2021

Franśiyäneñ “Le Monde” gazetı citkergänçä, il täwge xärbi ğaläm künegülären ütkärde.

France 24 kanalı xäbär itkänçä, Pfizer-BioNTech mart ayında Awrupa Berlegen 4 million doza Kovid-19 vakśinası belän täêmin itäçäk.

“Le Parisien” gazetı Franśiyäneñ İll-de-Frans töbägendä reanimaśiyälärdä yatuçı Kovid-19 awıruları sanındağı artu turında yaza.

Germaniyäneñ rnd.de säxifäse Törkiyä ilbaşı Räcäp Tayyip Ärdoğan belän Rusiyä däwlät başlığı Vladimir Putinnıñ Törkiyädä atom-töş reaktorı tözeleşen tantana belän başlap cibärüen xäbär itä.

Avstriyäneñ “Der Standard” gazetı İzrail xökümäte räise Netan’yaxunıñ täwge tapqır Berläşkän Ğaräp Ämirleklärenä baruı xaqında citkerä.

İspaniyäneñ “La Vanguardia” gazetı yazğança, ilneñ sälamätlek saqlaw ministrlığı bügen AstraZeneka vakśinasınıñ 65 yäş’kä qadärge härkemgä yasaluın raslarğa mömkin.

Venesuêlanıñ “Telesur” gazetı citkergänçä, Meksika wäkillär palatası marixuana qanunın qabul itte. Şulay itep, il älege matdäne üsterü, citeşterü, qullanu häm satuğa röxsät birde.

Ğaräp telle basmalardan “Al-Quds Al-Arabi” İzrail köçläreneñ 5 fälästinle sabıynı qulğa aluı turında yaza.

“Al Jazeera” kanalı xäbär itkänçä, İzrail –Misır söyläşülärendä iq’tisadi xezmättäşlek turında süz bardı.

Rusiyäneñ Lenta.ru säxifäse citkergänçä, Rusiyä Däwlät Duması räise Vyaçeslav Volodin ilneñ äkrenläp dollarğa bäylelektän qotılaçağın äytte.

“Rossiyskaya Gazeta” yazğança, ber nemeś Sputnik V vakśinasın qadatu öçen ğailäse belän bergä Rusiyägä kilde.

“Tatar-inform” mäğ’lümat agentlığı citkergänçä, irtägä Tatarstannıñ Arça rayonında yazuçı Möxämmät Mähdiyev äsäre buyınça fil’m töşerelä başlıy.