Dön’ya matbuğatına küzätü 03.12.2020

Germaniyäneñ ard.de säxifäse yazğança, Angliya Bionteks häm Pfayzernıñ koronavirus vakśinasına aşığıç qullanu röxsäte birgän berençe il buldı.

Nemeś telendäge Welt.de säxifäse citkergänçä, Formula-1neñ legendar pilotı Mixail Şumaxernıñ ulı Mik Şumaxer 2021nçe yıldan Haas F1 komandasında yarışaçaq.  

Germaniyäneñ “Deutsche Welle” gazetı yazğança, Interpol dön’ya külämendä koronavirus vakśinalarınıñ urlana aluı häm yalğan preparatlar çığarılu mömkinlege turında kisätte.

Ğaräp basmalarınnan “Elsabah” Tunisnıñ Fälästin mäs’äläsen çişü öçen xalıqara kiñäşmä ütkärergä çaqıruın xäbär itä.

“Elraya” gazetı Katar belän Törkiyäneñ strategik xezmättäşlegendä yaña ofıqlar açıluı turında yaza.

“Le Monde” gazetı citkergänçä, Franśiyäneñ êlekkege ilbaşı Valeri Jiskar d’Êsten ülde.

 Franśiyäneñ “Le Figaro” gazetı yazğança, Şveyśariyädä Liberiya suğışında (1999-2003) bulğan zolımnarğa qarata tarixi däğ’wa başlana.

Bel’giyäneñ “Le Soir” gazetı xäbär itkänçä, här öç flamandnıñ ikese vakśina yasatırğa äzer.

İspaniyäneñ “El Mundo” gazetı ildäge qunaqxanä tarmağınıñ bıyılnıñ noyabr’ ayın ozaq waqıt onıtmayaçağın yaza. Ul yabılular, çikläwlär häm 10 meñnärçä keşeneñ êşsez qaluı näticäsendä koronavirusnıñ ikençe dulqınınnan iñ nıq zarar kürgän sektor buldı.

Rusiyäneñ Lenta.ru säxifäse citkergänçä, Törkiyä Qırımnıñ annekśiyäsen beterü söyläşülären başlawda Ukrainanı yaqladı.

RİA Novosti agentlığı citkergänçä, NATO ğomum särqatibe Jens Stoltenbergnıñ Rusiyäne Qırım häm Qara diñgezdä xärbi köçen arttıruda ğayepläwenä Mäskäwdän cawap kilde: üz iminlegebezne saqlaw maqsatı belän xäräkät itäbez.  

Tatar-inform mäğ’lümat agentlığı citkergänçä, Tatarstan başqalası Qazanda 9 yaña uram barlıqqa kiläçäk. Aralarında İxtiram, Yaxşılıq, Ğadellek, Xikmät digän tatarça atamalar da bar.