Dön’ya matbuğatına küzätü 24.11.2020

Germaniyäneñ “Deutsche Welle” gazetası yazğança, Törkiyä tışqı êşlär ministrlığı törek köymäseneñ Liviyä sulıqlarında totqarlanuı säbäple Awrupa Berlege, İtaliyä ilçeläre häm Germaniyä wäkilenä kisätü yasawın belderde.

Spiegel.de säxifäse Gamburg fregatınıñ Liviyä sulıqlarında Törkiyä yök köymäsen, xalıqara xoquqnı bozıp, säğat’lär buyı tentüe turında yaza.

Tagesschau.de säxifäse citkergänçä, Germaniyä sälamätlek saqlaw ministrı, röxsät alınğannan soñ, dekabr’ ayında vakśinalaştıru êşçänlegen başlarğa ömetlänülären belderde.

Ğaräp basmalarınnan “Al-Quds Al-Arabi” yazğança, AQŞta ilbaşı bularaq saylanğan Djo Bayden fälästinle aktivist Rima Dudinnı Aq Yortqa yuğarı däräcäle urınğa quydı.

Al Jazeera citkergänçä, NATO häm Awrupa Berlege Baydennı mönäsäbätlärne qabat tözergä çaqırdı.

Katarnıñ “Al-Raya” gazetı xäbär itkänçä, BMOnıñ balalarğa yärdäm fondı UNİCEF kiläse yıl başında zur kampaniyä ütkärep yarlı däwlätlärgä Kovid-19 belän köräş maqsatınnan yaqınça 2 milliard doza vakśina tarataçağın belderde.

İspaniyäneñ “El País” gazetı ildä koronavirusqa qarşı kertelgän qatğıy çikläwlärneñ ikençe dulqınnı tuqtatuı turında yaza.

 İspaniyäneñ “El Mundo” gazetı citkergänçä, ber tikşerenü allergik astması bulğan keşelärneñ koronavirusnı azraq yoqtıruın kürsätkän.

Argentinanıñ “Infobae” mäğ’lümat çarası xäbär itkänçä, Venesuêla nefte tarixtağı iñ zur yuğalğan xäzinä bulırğa mömkin.

Franśiyäneñ “Le Monde” gazetı yazğança, Parijda Cömhüriyät häykäle yanındağı migrant lageren iminlek köçläre mäcbüri räweştä buşattı.

Şul uq ilneñ “Le Figaro” gazetı “AQŞ ilbaşı Donal’d Tramp xakimiyätneñ tüntärelüe öçen yäşel ut qabızdı” dip yaza.

France 24 kanalı Angliyädä yaña ğomumi karantinnıñ dekabr’ başında tögällänäçägen citkerde.

Rusiyäneñ TASS agentlığı xäbär itkäñçä, Tawlı Qarabaxta mina şartlawı näticäsendä Azärbaycan qorallı köçläreneñ ofiśerı hälaq buldı, Rusiyä tınıçlıq köçe ğaskäriye yaralandı.

Ria Novosti agentlığı xäbärenä qarağanda, Rusiyä saqlanu ministrlığı Tawlı Qarabaxta minadan çistartu êşçänlege alıp barıluın belderde.

Lenta.ru säxifäse Rusiyädän Awrupağa neft’ häm tabiğıy gaz êksportında kimü bulaçağın farazlıy.

Tatarstannıñ “Tatar-inform” mäğ’lümat agentlığı citkergänçä, bıyıl koronavirus kizüe arqasında “Tatar cırı” festivale ütkärelmäyäçäk.