Dön'ya matbuğatına küzätü 07.07.2020

“Al Quds Al Arabi” yazğança, Angliyä xökümäte räise Boris Djonson İzrail prem’yerı Bin’yamin Netan’yaxu belän telefon aşa söyläşkändä annekśiyä planı öçen borçulı buluın belderde.

İspaniyäneñ “El País” basması bügen İspaniyä xökümäteneñ awır xäldä qalğan ğailälärne öylärennän çığarmaw häm arenda tüläwlären 30nçı sentyabr’gä qadär kiçekterü turında söyläşäçägen citkerä.

Şul uq ilneñ “La Vanguardia” gazetı xäbär itkänçä, Meksika däwlät başlığı Andres Manuêl’ Lopes Obrador AQŞqa säfäre waqıtında ilbaşı Donal’d Tramp belän ike cıyılış ütkäräçäk.

Argentinanıñ “Infobae” mäğ’lümat çarası yazğança: Braziliyä däwlät başlığı Jair Bolsonaruğa, qayber bilgeläre bulğan öçen, koronavirus şöbhäse belän test yasaldı.

Germaniyäneñ “Deutsche Welle”gazetı xäbärenä qarağanda: nemeś xökümäteneñ turizm buyınça cawaplısı Tomas Bareys koronavirus arqasında kertelgän Törkiyägä säyäxät çikläweneñ tizdän beterelä aluı turında fiker belderde.

“Tagesschau.de” internet säxifäse Germaniyäneñ ildäge AQŞ berlekläre öçen 10 yılda 1 milliard yevrolıq çığımnar yasawın yaza.  

Bel’giyäneñ “Le Soir”basması xäbär itkänçä, koronavirus antitänçeklären tikşerü kümäk immunitet ixtimalınıñ äle bik yıraq buluın kürsätä.

Franśiyäneñ “Le Parisien” gazetı ildäge sośialist partiyäneñ berençe särqatibe Oliv’ye Forenıñ yaña kabinet turındağı tänqıyt’ süzlären alğı planğa çığara: “Bu xökümät tügel, patşa bulırğa teläwçı ilbaşınıñ kaprizı”.

Rusiyä gazetı "İzvestiya" yazğança, Rusiyädäge êş urınnarınıñ yartısı qabat êşli başladı.

Şul uq ilneñ TASSxäbär agentlığı citkergänçä, Rusiyä ministrlar kabinetı ilçelärneñ ike watandaşlıqqa iyä buluın tıyuçı qanun proyektın yaqladı.  

Tatarstannıñ “Tatar-inform”mäğ’lümat agentlığı tatar cämäğat’ êşleklese, mädäniyät xezmätkäre, Çuvaşiyä tatarları avtonomiyäse citäkçese Färit Ğıybatdinovnıñ xastaxanädä wafat buluın yaza. Ul anda koronavirus bilgeläre belän kergän ide.