Dön'ya matbuğatına küzätü 25.12.2019

Germaniyäneñ “Süddoyçe śaytung” gazetası yazğança, Ştutgart kiläse yılda şähärdä säğatenä 40 çaqrım tizlekne ğamälgä quyaçaq.

“Frankfurter Allgemayne śaytung” gazetı xäbärenä qarağanda, ber soraştıru näticäläre şunı kürsätkän: nemeślar Franśiyä ilbaşı Êmmanuêl’ Makronğa, Germaniyä kanślerı Angela Merkel’gä qarağanda, kübräk ışana.

“Al Jazira” telekanalı krizis belän bäyle diplomatik xäräkättän soñ Törkiyä mäcleseneñ Liviyägä xärbilär cibärü mäs’äläse turında bäxäsläşüen söyli.

Ğaräp telendäge basmalardan “Al Quds Al Arabi” yazğança, yaña milliyätçelek qanunı Hindstannı êtnik nigezlär arqılı qabat formalaştıra häm möselmannarğa qarşı qanunlı bularaq diskriminaśiyäne röxsät itä.  

Şul uq gazet Berläşkän Ğaräp Ämirlekläreneñ yäxüdlärne Xanuka bäyräme belän qotlawın häm moña İzrail tışqı êşlär ministrınıñ cawap birüen yaza.     

Franśiyäneñ “Lö Mond” gazetı Kanadada 6,3 ball zurlığındağı cir teträw buluın xäbär itä.

“Lö Parisyen” yazğança, Franśiyä hawa transportı qabat êşli başlayaçaq: oçuçılar häm salon xezmätkärläre êş taşlawların tuqtatırğa mömkin.

Boliviyäneñ “La Razon” gazetı Meksika xökümäteneñ La Pazdağı ilçelegen äyländerep alğan boliviyäle agentlardan qanäğat’sez buluın citkerä.

Çilineñ “La Tercera” çarasında yazılğança, ilneñ Valparaiso şähärendä 2 kön sünderelmägän yanğınnar säbäple afät iğ’lan itelde. 120dän artıq yort kölgä äwerelde.  

Rusiyäneñ RİA Novosti xäbär agentlığı İrannıñ AQŞ berleklären çığaru mäs’äläsendä Süriyägä yärdämgä xäzer buluı turında yaza.

Tatarstannıñ “Tatar-inform” agentlığı Böyek Watan suğışı veteranı, Xärbi fännär akademiyäse prezidentı Mäxmüt Äxmät ulı Gäräyevnıñ wafat buluın citkerä. Aña 96 yäş’ ide.