Dön'ya matbuğatına küzätü 27.06.2019

Ğaräp telendä çığuçı “Alquds Alarabi” gazetı yazğança, AQŞ senatı Trampnıñ İranğa qarşı xärbi xäräkäten buldırmas öçen comğa könne tawış birü uzdıraçaq.

Şul uq mäğ’lümat çarası Manamada uzğan forumnan soñğı fikerlär belän urtaqlaşa. Anda yazılğança, Kuşner Fälästin idaräsen unışsız dip sanıy häm işeklärneñ xaman açıq buluın äytä.

Germaniyäneñ Tagesschau.de säxifäse nemeś şirkätläreneñ, ambargo häm suğışqa qaramastan, Süriyägä qoral bularaq qullanılırğa mömkin ximik matdälär satuın faş itä.

Şul uq ilneñ “Welt” matbuğat çarası Germaniyäneñ Tön’yaq Ren-Vestfaliyä töbägendä poyezdlarnıñ êsselektän yöri almas xälgä kilüen xäbär itä.

Franśiyäneñ “Le Parisien” gazetı “İran belän suğış çıqqan oçraqta Tramp qorı cir ğaskärlärenä ixtiyac toymayaçağın belderde” dip yaza

Şul uq ilneñ “Le Temps” gazetı Qaşıqçı däğ’wasın iskä töşerä. Maxsus reportyerlar waqıyğanı küzätüdän tuqtamıy.

İspaniyäneñ “La Vanguardia” gazetı yazğança, ilneñ Tarragona cirlegendä däwam itüçe yanğın äle xaman kontrol’ astına alınmadı häm yaqınça 3600 gektarlıq alannı köl itte.

“ABC” xäbär itkänçä, irtägä hawa tağın da cılı. Franśiyädä çiktän tış êsselek arqasındağı ülemnärdän soñ İspaniyädä afät signalı birelgän töbäk sanı 32gä citte.

Rusiyäneñ “RİA Novosti” agentlığı Donal’d Tramp häm Vladimir Putinnıñ comğa könne säğat’ 14tä Osaka şähärendä oçraşaçağı turında yaza.

Şul uq ilneñ “İzvestiyä” gazetı Ukraina ilbaşı idaräseneñ başqalanı Kiyevtan başqa şähärgä küçerü täq’dime xaqında xäbär itä.

Tatarstannıñ “Tatar-inform” mäğ’lümat agentlığı yazğança, Kazan Rusiyädä yäş’lärgä säyäxät itü öçen iñ qızıqlı şähärlär bişlegenä kergän.