Dönya matbuğatına küzätü 30.03.2016

Gretsiyädäge “Tribune" isemle bäysez media platforması “Könbatışnıñ xataları terrorçılıqnı arttırdı" dip atalğan yazmasında Törkiyä Premyer-ministr Äxmät Dawıtoğlunıñ, Törkiyä häm Awrupada terror höcümnäreneñ artuın Könbatışnıñ Süriyä mäs'äläsendäge yalğış säyäsätenä bäyläp, monnan arı Awrupa öçen bik citdi säyäsi üzgäreş waqıtınıñ citüen äytüen citkerä.

Amerika Quşma Ştatlarındağı “Liberal" xäbär häm blog säxifäsendä dönya kürgän Arianna Huffingtonnıñ “Je Suıs Turkey (Min Törkiyämen)" isemle mäqaläsendä isä bolay diyelä:

“Törkiyä iyün' ayınnan birle altı bombalı höcümgä duçar buldı. Bu höcümnärdä “Charlie Hebdo" höcümendä ülüçelärdän tağın da kübräk keşeneñ ğomere özelde häm bez äle haman Törkiyä tügelbez. Berkem dä Törkiyädäge küpläp üterülär turında äytmi, berkem dä Törkiyädä gäyepsez keşelärneñ üterelüenä rizasızlıq beldermi häm hiçber dönya liderı yäki räsmi zatı teläktäşlek maqsatınnan çığıp Törkiyä uramnarında yöremi. “Facebook" qullanuçılarınıñ profil räsemnärendä Törkiyä bayrağın qullanuların kire qaqtı. Törek häm möselman duslarıbız belän teläktäşlek urnaştıru, alarnıñ yanında bulu - yaxşı başlanğıç bulaçaqtır. Näq menä şuña kürä Je suis Turkey (Min Törkiyämen)".

Üzäge Frantsiyada urnaşqan “Euronews" xalıqara xäbär kanalı: “Törkiyä tapşırğan terrorçını irekkä cibärü zur xata" isemle xäbärendä İzrail küzläw häm transport ministrı Israel Katznıñ, belgiyalılar tormışnıñ käyefen alıp, demokrat itep kürenergä däwam itkän oçraqta terrorçılıqnı ciñä almayaçaqların belderüen citkerä.

Rusiyäneñ “Sputniknews" internet säxifäse xäbär itüençä, Rusiyä Federatsiyäse xärbi wäkillege Törkiyä reaktiv oçqıçlarınıñ Rusiyä xärbi oçqıçın bärep töşergännän soñ berençe tapqır Törkiyägä kilde. Öç ofitserdan torğan Rusiyä xärbi wäkillege Awrupa iminlek häm xezmättäşlek oyışmasınıñ ışanıç häm iminlek arttıruçı çaralarğa qağılışlı Vena dokumentı qısalarında İzmirnıñ Foça ilçäsendäge diñgez nığıtmasına (bazasına) “bäyäläw säfären" qıldı.

“Amerika awazı" radiosınıñ internet säxifäsendä Törkiyä Tışqı eşlär ministrı Mäwlüt Çavuşoğlunıñ radioğa birgän äñgämäsendä, Törkiyä belän Amerika arasındağı mönäsäbätlärneñ soñğı waqıtta bozıluı turındağı xäbärlärne kire qağıp, ike berlektäş arasında qayber mäs'älälärdä üzgä fiker yörtüneñ normal' barış buluın belderüe äytelä.

Çavuşoğlu: “Bez möhim ike partnyor häm urtaq maqsatlarıbız bar. Ämma qayçağında törle mäs'älälärdä üzgä uylıy alabız, bu töşençäbezne açıq räweştä äytkän çaqta da, äyterseñ, ike il arasında problema bar kebek abaylana. Hiçber ike il här mäs'älädä 100% ber fikerdä bula almıy. Mäsälän, “PYD" mäs'äläsendä alar ayırmalı uylıy, bez başqa törle uylıybız, diyep üpkälämibez inde", - dip äytte.

QHA Qırım xäbär agentlığınıñ internet säxifäsendä Törkiyä mädäniyät häm turizm ministrı Mahir Ünalnıñ "Ukraina xalıqara turizm häm säyäxät yärminkäse"n açıp cibärü häm bertörkem oçraşular ütkärü öçen çärşämbe könne Ukraina başqalası Kievka kilüe turında xäbär itelä häm biredäge programması turında mäğlümat birelä.

İrannıñ “Farsı" xäbär agentlığı “Täbriz-Kars timer yulı proyektı başladı" dip xäbär itä. İnternet säxifäsendäge xäbärgä kürä, Könçığış Azärbaycan yul häm şähär tözeleşe idaräse ğomum mödire Tävhid Ahlaki Täbriz – Bazärgan timer yulı proyektı belän bäyle kileşügä uzğan yılda qul quyıluın häm biş yılda tämamlanuınıñ zarurlığın beldergän.

Norvegiyanıñ “Dagens Næringsliv" isemle könlek iqtisad gazetı “Toraq bazarınıñ yoldızı Törkiyä" isemle yazmasında dönyaküläm toraq bäyäläre belän bäyle xisapnıñ 2015nçe yılda iñ küp üskän bazarnıñ Törkiyä toraq tarmağı buluın kürsätüen belderä.

Xisapqa kürä, toraq bäyälärendäge artunıñ iñ zur säbäplärennän berse Törkiyäneñ nıq iqtisadi üseşe. Törkiyädä toraq bazarı 2015nçe yılda 14,32%qa üskän.