Üzbäkstanda Şanxay xezmättäşlek oyışması cıyılışları uzdı

Üzbäkstannıñ çirattağı räislege säbäbe belän Şanxay xezmättäşlek oyışması çaraları bıyıl Üzbäkstanda uza. May ayında oyışmanıñ möhim cıyılışları häm forumnarı Üzbäkstannıñ törle şähärlärendä ütte.

11-12 nçe mayda Taşkentta Şanxay xezmättäşlek oyışmasınıñ Xalıq diplomatiyäse forumı uzdı. Forumğa oyışmanıñ äğ’za illärennän 120 dän artıq wäkil kilde. Xalıq diplomatiyäse forumı Üzbäkstannıñ täq’dime belän 2017 nçe yıldan birle ütkärelä.

12 nçe mayda Xivä şähärendä gibrid formatta Şanxay xezmättäşlek oyışması transport ministrlarınıñ 9 nçı cıyılışı uzdı. Oçraşu axırında xezmättäşlek protokolına qul quyıldı häm urtaq êş törkeme buldıru turında qarar qabul itelde.

13 nçe may könne Şanxay xezmättäşlek oyışmasınıñ ğomum särqätibe Yang Ming Üzbäkstanğa kilde. Anı Üzbäkstan ilbaşı Şäwkät Mirziyayev häm tışqı êşlär ministrı wäkile Vladimir Norov qabul itte. Oçraşular waqıtında ağımdağı yılnıñ 15-16 nçı sentyabrendä Sämärkandta uzaçaq Şanxay xezmättäşlek oyışması sammitına äzerlek häm oyışmanıñ problemaları turında söyläştelär.

16 nçı mayda Boxarada Şanxay xezmättäşlek oyışmasınıñ Banklar assośiaśiyäse belgeçläre häm koordinatorları cıyılışı ütte. Cıyılış kön tärtibendäge töp tema milli aqça belän säwdä itügä östenlek birü ide.

17 nçe may könne Şanxay xezmättäşlek oyışmasına äğ’za däwlätlärneñ karantin öçen cawaplı ministrlıq wäkilläre häm citäkçeläre cıyılışı ütte.

19 nçı mayda Taşkentta gibrid formatta Şanxay xezmättäşlek oyışması turizm ministrlarınıñ 19 nçı cıyılışı uzdı. Oçraşuda Hindıstannıñ Varanasi şähäre oyışmanıñ turizm häm mädäniyät başqalası itep saylandı. Şanxay xezmättäşlek oyşmasınıñ xalıqara turizm forumı 20 nçe mayda “Şanxay xezmättäşlek oyışmasına äğ’za illär arasındağı mönäsäbätlärdä yaña çor: turizm häm mädäni miras” iseme astında ütte. Şul uq könne Şanxay xezmättäşlek oyışmasınıñ mädäniyät ministrları cıyılışı da ütkärelde. Cıyılış azağında muzey ölkäsendä xezmättäşlek turında memorandumğa qul quyıldı.

20 nçe mayda Üzbäkstanda Şanxay xezmättäşlek oyışmasınıñ   sport öçen cawaplı ministrlar cıyılışı uzdı. Oçraşu axırında “Şanxay xezmättäşlek oyışmasına äğ’za illär xökümätläre arasında 2022-2024 nçe yıllarda sport ölkäsendä xezmättäşlekne üsterügä qağılışlı çaralar planı” qabul itelde.

Bıyıl Şanxay xezmättäşlek oyışması qısalarında 80 çara uzdıru planlaştırılğan bulsa , alarnıñ 40 ı xäzergä qadär Üzbäkstanda ütkärelde. Waqıyğalardan kürengänça, Taşkent citäkçelege älege çaralarnı ilneñ törle şähärlärendä ütkärügä zur ähämiyät birä. Üzbäkstan üzeneñ çirttağı räislege çorında oyışmanı nığıtuğa ,üsterügä zur öleş kertä.

Dön’ya xalqınıñ yartısı diyärlek  Şanxay xezmättäşlek oyışmasına ağ’za illärdä yäşi. Şuña kürä oyışmanıñ möhimlege könnän - kön arta. Şanxay xezmättäşlek oyışmasınıñ dialog partnyerı Törkiyä oyışmağa äğ’za  yäki küzätüçe bulırğa tırışsa bu ike yaq öçen  dä faydalı bulaçaq. Älege wäzğıyät’  Könçığış belän Könbatış arasında möhim urında torğan Törkiyäneñ Yañadan Aziya iniśiativasına da turı kilä.