Şanxay xezmättäşlek oyışması xökümät başlıqları cıyılışı

3 nçe noyabr’dä Bişkäktäge Ala Arça däwlät qunaq yortında Şanxay xezmättäşlek oyışmasınıñ xökümät başlıqları cıyılışı uzdı.Cıyılış tar häm kiñäytelgän formatlarda ütkärelde. Tar formattağı cıyılışta Qırğızstannıñ waqıtlıça xökümät başlığı Sooronbay Cäänbäkov belän bergä Qıtay Xalıq Cömhüriyäte premyer-ministrı  Li Keqiang,Qazaqstan premyer-ministrı Bakıtcan Sagintayev,Rusiya Federaśiyäse xökümät başlığı Dmitriy Medvedev ,Tacikstan premyer-ministrı Kohir Rasulzoda häm Üzbäkstan premyer-ministrınıñ berençe urınbasarı Röstäm Azimov qatnaştı. Cıyılışta oyışma êşçänlekläre häm imzalanaçaq qararlar bäxäsläşelde.

Şanxay xezmättäşlek oyışmasınıñ xökümät başlıqları cıyılışı soñraq kiñäytelgän formatta däwam itte. Älege cıyılışta Belarus’ premyer-ministrı Andrey Kobyakov, Äfganstan başqarma wäkillege başlığı Abdullah Abdullah, Hindıstannıñ tışqı êşlärdän cawaplı däwlät ministrı Cahit Äkbär,İran İslam Cömhüriyäte tışqı êşlär ministrı urınbasarı İbrahim Rahimpur, Mongoliyanıñ Qırğızstandağı tulı wäqalätle ilçese Zhagir Suhee,Paqıstan premyer-ministrınıñ tışqı êşlär kiñäşçese Sartaj Aziz,oyışma särqätiplege belän oyışmanıñ regional’ antiterrorçılıq başqarma komitetı başlığı da qatnaştı. Cıyılışta Awraziya iqtisadi Berlege belän Şanxay xezmättäşlek oyışması arasında integraśiya, terrorğa qarşı köräş ,iqtisadi xezmättäşlekne üsterü häm başqa mäs’älälär qaraldı.

Cıyılış azağında xökümät başlıqları 12 dokumentqa imza saldı. Alar arasında oyışmanıñ 2017-2021 nçe yıllarğa programma proyektı, 2016-2020 nçe yıllarda fänni häm texnik xezmättäşlek,2017 nçe yıl byudjetı häm xisapları belän bergä Şanxay xezmättäşlek oyışması Qalqınu bankı häm Qalqınu waqıfı buldıru turındağı dokumentlar da bar.  Şanxay xezmättäşlek oyışması xökümät başlıqları cıyılışı 2017 nçe yılda Rusiyädä ütkäreläçäk. Bişkäktä uzğan cıyılışnı 250 dän kübräk jurnalist qarap bardı.

Yuğarı däräcäle oçraşu qısasında Qırğzstan-Qazaqstan häm Qırğızstan – Qıtay arasında xökümät başlıqları däräcäsendä ike yaqlı söyläşülär dä ütkärelde. Qırğızstan häm Qıtay xökümäte başlıqları söyläşüendä kapital salu, texnik häm iqtisadi xezmättäşlek,metereologiya tarmaqlarında 6 dokument imzalandı. Şulay uq Qırğızstan belän Qıtay arasında Qırğızstannıñ suğaru sistemasın yaxşırtu häm Bişkäk şähäre avtoyulların yañartu  proyektların tormışqa aşıru ,Qırğızstan iqtisad ministrlığı belän Qıtay Xalıq Cömhüriyäte säwdä ministrlığı arasında xezmättäşlekne üsterü xaqında kileşü täêmin itelde.

Cıyılıştan êlek Şanxay xezmättäşlek oyışması äğzası illärneñ xökümät başlıqların Qırğızstan ilbaşı Almazbäk Atambayev qabul itte. Atambayev Rusiya Federaśiyäse premyer-ministrı Dmitriy Medvedev häm Qıtay Xalıq Cömhüriyäte premyer-ministrı Li Keqiang belän dä ayırım-ayırım oçraşıp söyläşte.

       15 yıllıq ütkäne bulğan Şanxay xezmättäşlek oyışması köçle regional’ oyışma bulu yulında alğa bara. Bişkäktä uzğan Şanxay xezmättäşlek oyışması xökümät başlıqları cıyılışınıñ iñ möhim näticäse itep Qalqınu bankı buldıru belän bäyle qarar imzalanuın kürsätergä mömkin. Qırğızstan ilbaşı Atambayevnıñ Taşkenttağı cıyılışta Qalqınu bankı üzak ofisınıñ Bişkäktä buluın täqdim itüen dä xäterlätep kitik.

Soñğı däwerdä ike yaqlı mönäsäbätläre qabat kiyerenke tös alğan Paqıstan belän Hindıstan cıyılışqa wäkil cibärep illäreneñ oyışmağa quşılu qatğilığın kürsätte. Äfganstan başqarma wäkillege başlığı Abdullah Abdullahnıñ  cıyılışta Äfganstannıñ oyışmağa tulı äğza bulırğa teläwen yañartuı kiläse yuğarı däräcäle oçraşuda qaralaçaq.

Qazaqstan premyer-ministrı Sagintayevnıñ irekle säwdä mäydanı buldıru fikere dä oyışmanıñ iqtisadi bularaq üsüenä öleş kertäçäk fiker dip äytergä bula. Qısqaça ğına äytkändä Şanxay xezmättäşlek oyışması Bişkäktä ütkärgän cıyılışı belän üsü häm nığu, köçäyü yünäleşendä möhim adım yasadı.