هنګري : په ناټو کې د سویډن د غړیتوب پر مسئلې باید بیړه ونشي

 د هنګري لومړي وزیر ویکتور اوربان ویلي چې په ناټو کې د سویډن د غړیتوب د تصویب لپاره کومه بیړه نشته.

اوربان د هنګري پارلمان ته په وینا کې وویل ، د سویډن امنیت ته کوم ګواښ نشته.

هنګري د جون په میاشت کې اعلان وکړ چې د سویډن د ناټو غړیتوب لپاره د تصویب غونډه تر مني پورې وځنډول شوه.

د ۲۰۲۲ کال د فبرورۍ په ۲۴ مه د روسیې او اوکراین جګړې له پیل وروسته فنلنډ او سویډن خپله د څو لسیزو راهیسې د پوځي بې طرفۍ پالیسي پای ته ورسوله.

دواړو هېوادونو د تېر کال په مې میاشت کې د ناټو د غړیتوب لپاره غوښتنه وکړه او فنلنډ چې له تورکیې سره یې کړې ژمنې پوره کړې، د اپریل په څلورمه د ناټو ۳۱ غړی شو.