د  هند او پاکستان  ترمنځه  د جمو کشمیر  د کنټرول په کرښه کې نښته شوې ده .

د پاکستان  پوځ  ویلي دي چې پدې نښته کې  ۳ تنه پاکستاني سرتیري ، پنځه تنه هندي سرتیري او دوه تنه هم  ملکي وګړي وژل شوي دي.

د پاکستان د پوځ د عامه اړیکو دفتر تیره ورځ  د بیان په خپرولو سره ویلي دي چې  د کنټرول په کرښه کې  د لیپا په سیمه کې د هندي ځواکونو  د برید له امله  ۳ تنو پاکستاني سرتیرو ژوند د لاسه ورکړ.

په بیان کې راغلي دي چې  پاکستاني سرتیرو  په هندي لورې ځوابي بریدونه وکړل چې په پایله کې  ۵ تنه هندي سرتیري ووژل شول او ګڼ شمیر نور ټپیان شول.

همداشان په پوله کې د هندي ځواکونو لخوا د راتوغول شوي  هاوان  توپ  په برید کې  دوه تنه  ملکي وګړي وژل شوي دی.

هندي ځواکونو  بیا د پاکستان د ادعا په اړه څه ندي ویلي. د بله پلوه  نن  سهار  د پاکستان د پوځ ویاند  جنرال  اصف غفور  د ټولنیزې مډیا له لارې په خپور کړي پیغام کې ویلي دي چې  هندي ځواکونو یو تن بل پاکستاني سرتیری هم  وواژه.

پاکستان  هندي  لوری  د اوربند نه په سرغړونې تورن  کړی دی. دا نښته پداسې حال کې وشوه چې تیره ورځ  هندوستان  د خپلواکه  ۷۳یمه کلیزه ولمانځله.

دا نښته  پرون  د ماښام  په ساعتونو کې  رامنځته شوې ده .