د لیبیا د ملي جوړجاړي حکومت د خلیفه حفتر اړوند د جنګي الوتکې د ویشتو نه خبر ورکړ

د لیبیا د ملي جوړجاړي  حکومت د یو بیان په خپرولو سره ویلي دي چې  د دوی ځواکونو  د پلازمینې طرابلس سویل لوري ته  د وادي الرابي  په سیمه کې  د خلیفه حفتر د ځواکونو اړوند  جنګي الوتکه  ویشتې ده.

په بیان کې د الوتکې د پیلوټ  د برخلیک په اړه څه ندي ویل شوي.

همداشان پدې بیان کې  د خلیفه حفتر  ۲۵ تنه ځواکونه  د خپلو وسلو او موټرو سره  یو ځای  د جوړجاړي حکومت ځواکونو ته د تسلمیدو نه هم  خبر ورکړی دی.

په بیان کې راغلي دي چې  د طرابلس  په سویل کې  د اَسوان  په سیمه کې  د خلیفه حفتر  اړوند ۲۵ تنه جنګیالي د خپلو موټرو او وسلو سره  د ملي جوړجاړي حکومت ځواکونو ته تسلیم شوي دي.

د ویلو ده چې  په لیبیا کې  د جنرال خلیفه حفتر ځواکونو  د لیبیا د ختیځ نه د پلازمینې طرابلس پر لورې  بریدونه کړي دي. خلیفه حفتر  د اپریل په ۴ مه نيټه   پلازمینې طرابلس د نیولو په خاطر خپلو ځواکونو  ته  د سترو عملیاتو د پیلولو امر کړی وو.

ددې په مقابل کې د لیبیا د ملي جوړجاړي حکومت  چې د نړۍوالې ټولنې لخوا په رسمیت پيژندل شوی دی  متقابل  عملیات  پيل کړل.

د بله پلوه  د روغتیا نړۍوال سازمان ویلي دي چې په لیبیا کې د تیرو لسو ورځو راهیسې په روانو نښتو کې  ۱۲۱ تنه وژل شوي او ۵۶۱ تنه نور ټپيان شوي دي.