د انګلستان د اپوزیسیون مشر ویلي دي چې جولین اسانج باید امریکا ته ونه سپارل شي

د انګلستان د کارګر ګوند  مشر  کربین  د ټولنیزې مډیا له لارې په خپور کړي پیغام کې ویلي دي چې په عراق او افغانستان کې  ترسره شوو ظلمونو  او ناوړه کړونو  د افشا کولو په خاطر  جولین اسانج باید  امریکا  ته  ونه سپارل شي. د امریکا لخوا  د اسانج د غوښتنې سره  باید  د انګلستان  حکومت  سخت مخالفت وښايي.

همداشان  د انګلستان  د کارګر ګوند مشر  د اسانج په اړه  د خپور کړي پيغام سره  سم  هغه ویدیو  چې  د امریکايي ځواکونو لخوا په عراق کې  لس تنه ملکي وګړي او دوه تنه خبریالان  په ناحقه توګه وژل شوي دي او د ویکي لیکس  لخوا  نشر شوې وه هم  خپره  کړې ده .

د یادولو وړ ده چې د ویکي لیکس  موسس  جولین اسانج  د ۲۰۱۲ کال  کې  په لندن کې د ایکوادور  سفارت ته پناه وړې وه  او هلته اوسیده. ایکوادور  پرون  د هغه نه د پناه حق بیرته واخیست  چې د لندن پولیسو  هغه د ایکوادور په سفارت کې  ونیو.

جولین اسانج  د ویکي لیکس  د ویبپاڼې د جوړولو نه وروسته په ۲۰۱۰ کال کې  د امریکا لخوا په عراق او افغانستان کې د ترسره شوو جنایتونو  یو زیات شمیر محرم  اسناد او شواهد  د ویکي لیکس ویبپاڼې لخوا  خپاره کړل.