د قزاقستان ولسمشر نورسلطان نظربایوف له خپلې دندې  استعفا وکړه.

نظربایوف  له دندې نه د استعفا کولو خبر  هیوادوالو په خطاب کې په خپله تلویزیوني وینا کې  اعلان کړ. هغه  وویل چې  د څه باندې ۳۰ کلونو راهیسې  د هیواد د ولسمشر په توګه  دنده  ترسره کړې  او اوس  ددې وخت رارسیدلی دی چې  د ولسمشرۍ د صلاحیتونو  نه لاس په سر شي. هغه ویلي دي چې  دا ډیره ګرانه پریکړه وه خو بالاخره  پدې قادر شو چې دا پریکړه وکړي.

هغه وویل چې  په ۱۹۹۱ م کال کې د پخواني شوروي اتحاد  د ویشل کیدو نه وروسته  پداسې حال کې  د هیواد  مشرۍ په غاړه واخیسته چې هیواد د سیاسي پلوه  د ډیر سترو ننګونو سره  مخامخ وو. د توتالیتر  سیستم  په ړنګولو سره  د هیواد سیاسي نظام  مدرن کړ. یو ډیموکراتیک  سیستم يي رامنځته کړ.

هغه وویل چې  د هیواد د اقتصادي پراختیا  او خلکو د ژوند د کچې د لوړولو په خاطر يي ډیر زیات څه کړي دي. نظربایوف وویل چې  د ولسمشرۍ په دوره کې د هیواد اقتصاد ۱۵ برابره  قوي کړې، سرانه ملي عواید يي  ۹ برابره لوړ کړي  او د بې وزلې او فقر کچه لس برابره  راټیټه کړې ډه .

هغه ویلي دي چې  قراقستان يي د نړۍ  د ۵۰ پرمختللو او قوي اقتصاد خاوندو هیوادونو په کتار کې داخل کړی دی. هدف يي  د نړۍ په ۳۰ پرمختللو هیوادونو په کتار کې داخلیدل وو.

هغه وویل چې  د هیواد په تاریخ کې د لومړي ځل لپاره  پلازمینه  استانه  جوړه کړه. استانه  د قزاقستان د بریالیتوبونو  او ظفر  سمبول دی.

نظربایوف  وویل چې  هر څه  د ولسمشرۍ په ټاکنو کې د خلکو په ازاده رای ټاکل شوی  او خلکو ترینه  قوي ملاتړ کړی دی چې د همدې امله خپل ستر ملت   او هیواد ته د ترسره کړو خدماتو له امله  افتخار کوم. د خپلو هیوادوالو نه  د زړه له کومې  مننه کوم  او ټولو ته  خپل احترامات  وړاندې کوم.

هغه وویل  چې د ولسمشرۍ د دندې نه  استعفا کوي خو  د ملي امنیت په شورا کې له خپلې دندې، د خپل ګوند د مشرۍ او اساسي قانون د شورا د غړیتوب له دندو  استعفا نکوي. دا  دندې به يي دوام  وکړي.

هغه وویل چې  تل  به د خلک ملت  ترڅنګ  ولاړ وي. هغه وویل چې  د هیواد او خلکو اندیښنې زما  اندیښنې دي. د موسس  ولسمشر په توګه  غواړم چې خپل  راتلوونکي اهداف  او په هیواد کې  ژور اصلاحات  د نوي نسل چارواکیو سره  رامنځته کړم. هغه وویل چې  وار د ځوانانو دی چې باید  واک ورته وسپارو.

د ویلو ده چې د قزاقستان د مشرانو د جرګې رئیس قاسم جومرد توقایوف د هیواد د موقت دولت د مشر په توګه وټاکل شو.