شمالي کوریا امریکا په قاطع اقداماتو وګواښه.

شمالي کوریا  امریکا  په قاطع  اقداماتو  وګواښه.

د شمالي کوریا د بهرنیو چارو وزارت  د امریکا لخوا  د کوریا نیمه ټاپو وزمې ته   د جنګي الوتکو د کښتیو په ګډون  د جنګي او هجوم  کښتیو  د استولو  په غبرګون کې ویلي دي چې  د مدرنو وسلو سره به د ځان نه دفاع وکړي.

د شمالي کوریا  رسمي خبري اژانس نن  سې شنبه د اپریل ۱۱ مه د بهرنیو چارو د وزارت د ویاند له قوله ویلي دي چې  د شمالي کوریا پر خلاف  د امریکا  بې شرمانه  تیري  نوې او جدي پړاو ته داخل شوي دي.

هغه  د امریکا د ولسمشر دونالد ټرامپ  د وروستیو ګواښونو په ځواب کې چې ویلي وو که چیرې  شمالي کوریا  اټومي پروګرام  ونه دروي  واشنګټن به په یواځې ځان  په اقداماتو لاس پورې کړي  وویل ، « مونږ  د خپل هیواد  او خلکو نه د دفاع  په خاطر  قوي  او کلک تدابیر نیولي دي  او نیولو ته دوام ورکوو. »

هغه ویلي دي چې شمالي کوریا به د مدرنو وسلو سره  د واشنګټن په مقابل کې  د ځان نه دفاع وکړي.

هغه  د امریکا  دولت ته  ګواښ کړی دی چې  په شمالي کوریا د هر ډول برید عواقب به  ډیر  بد وي او مسئولیت به يي ستاسې په غاړه وي. هغه ویلي دي چې امریکا  د بدو عواقبو انتظار وکړي.

د یادولو وړ ده چې د امریکا  متحده ایالتونو ولسمشر دونالد ټرامپ  د تیرې یکشنبې په ورځ  د اپریل په نهمه  نیټه  چین ته  خبرداری وکړ چې  د شمالي کوریا اټومي پروګرام مخنیوی وکړي که نه وي  امریکا به په یواځې ځان  د شمالي کوریا په مقابل کې  اقدام وکړي.

د بله پلوه  نړۍوال شننونکي  پدې اند  دي  چې  ټرامپ  په سوریې د توغندیو د برید سره په اصل کې شمالي کوریا ته هم  غوڅ پیغام ورکړ.

د بله پلوه  د امریکا  ولسمشر ټرامپ  د کوریا ټاپو وزمې ته  استولو جنګي بیړیو او امریکايي ځواکونو ته د اماده باش امر کړی دی .