په فرانسه کې یو ځل بیا په پولیسو برید وشو

په فرانسه کې نن سهار یو ځل بیا په پولیسو برید وشو چې له امله يي د دوو تنو پولیسو په ګډون درې تنه ټپیان شول.
د انډیپینډینت ورځپاڼې د خبر له مخې نن سهار د پاریس په سویل کې وسله والو کسانو په پولیسو برید وکړ چې له امله يی درې تنه ټپیان شول.
دا برید په پاریس کې د شارلي هیبدو مجلې په دفتر د خونړیز برید نه یواځې ۲۴ ساعته وروسته رامنځته شوي دی .
پولیسو ویلي تر اوسه پورې دا لا څرګنده نده چې دا برید د شارلي هیبدو مجلې په دفتر د برید سره کوم تړاو لري او که نه.
د ترلاسه شوو معلوماتو له مخې دوو تنو وسله والو په پولیسو د برید نه وروسته د تیښتې په حال کې ول چې موټر يي ټکر وکړ. د برید کوونکو نه یو تن نیول شوی او بل تن په تیښته بریالی شوی دی.

د پاریس په دویم برید کې  د ټپي شوو پولیسو نه  ښځینه پولیسې په روغتون کې ساه ورکړه. 
په برید کې یوه میرمن هم ټپي شوې ده . د بل تن برید کوونکي د نیولو په خاطر پراخه عملیات پیل شوي دي .
د یادولو وړ ده چې تیره ورځ د اروپا په وخت په ۱۱بجو او ۳۰ دقیقو درې تنو برید کوونکو په پاریس کې د شارلي هیبدو مجلې په دفتر چې د پيغمبر ص د کاریکاتور د خپرولو سره يي په نړۍ کې سخت غبرګونونه پارولي وو برید وکړ. په برید کې د دوو تنو پولیسو په ګډون ۱۲ تنه مړه او شاوخوا شل تنه نور ټپیان شول. په برید کې د مجلې د خپرونو عمومي مشر او ۴ تنو کاریکاتورستانو ژوند د لاسه ورکړ.