د سعودي عربستان او عراق ترمنځه  تړلې  سرحدي دروازه ۲۹ کلونو وروسته  پرانیستل کیږي.

په عراق کې د سعودي عربستان لوی سفیر عبدالعزیز الشمري د العربیه تلویزیون سره په مرکه کې ویلي دي چې د رعقا او سعودي عربستان ترمنځه یواځنۍ د ار ار سرحدي دروازه به د روان کال د اکتوبر په ۱۵ مه نيټه  رسمآ پرانیستل شي او په فعالیت به پيل وکړي.

هغه وویل چې  دا سرحدي دروازه به د بغداد او ریاض ترمنځه د خلکو د تګ راتګ  سره  ډیره زیاته مرسته وکړي . په ځانګړې توګه د حج د مراسمو پر مهال. هغه ویلي دي چې تمه کیږي په کال کې ۶۰۰ زره تنه عراقیان  ددې سرحدي دروازې له لارې سعودي عربستان ته سفر وکړي.

د یادولو وړ ده چې د ار ار سرحدي دروازه د سعودي عربستان او عراق ترمنځه  د ۸۱۲ کیلومتره ګډه پوله کې  یواځنۍ سرحدي دروازه ده.

د عراق لخوا په ۱۹۹۰ میلادي کال کې د کویټ د اشغالولو نه وروسته  سعودي عربستان ددې هیواد سره  خپلې ټولې ډیپلوماتیکي اړیکې پرې کړې او سرحدي دروازه يي هم  وتړله.

عراق  په هیواد کې د داعش ترهګرې ډلې د تهدید د لمنځه تلو نه وروسته د ټولو ګاونډیو او سیمې هیوادونو سره  د ښو اړیکو د جوړولو  په خاطر  په هلو ځلو پيل وکړ.

پدې چوکاټ کې د عراق او سعودي عربستان ترمنځه د اړیکو د ودې په خاطر دواړه هیوادونو د ۲۰۱۷ کال د اکتوبر په میاشت کې هماهنګۍ ګډه شورا جوړه کړه.

یادې شوې شورا  په ۱۶ جلا جلا برخو کې  د دواړو هیوادونو ترمنځه تفاهم نامې لاسلیک کړې وې. یادې شوې شورا ویلي وو چې  د دواړو هیوادونو ترمنځه د اړیکو د غښتلتیا  او لا قوي کولو په خاطر  باید  سرحدي دروازه  پرانیستل شي او په متقابله توګه  یو بل هیواد ته په الوتنو پیل وشي.