تركيې په عراق كې د كردانو سيمې پر الوتنو بنديز ولګولو

په اربيل كې د تركيې قونسلګرۍ اعلان وكړ چې د راتلونكې جمعې د ورځې وروسته به د سليمانيې او اربيل ښارونو ته د تركيې د مسافر وړونكو الوتكو سفرونه وځنډول شي.

پدې ډول د تركيې درې هوايي شركتونه چې اوسمهال دې ښارونو ته الوتنې لري، د جمعې تر ورځې وروسته نور نشي كولاى چې دې ښارونو ته لاړې شي.

دا پرېكړه وروسته له هغې وشوه چې د عراق د مركزي ادارې لومړي وزير حيدر العبادي په شمال كې د كردانو د سيمه ايزې ادارې نه غوښتنه كړې وه چې د هوايي ډګرونو د تنظيم چارې دې مركزي حكومت ته وسپاري.

د تركيې سربېره د ايران، اردن، لبنان او مصر هېوادونو هم سليمانيې او اربيل ته خپلې الوتنې ځنډولې وې.