په جلال آباد او مزار کې چاودنې شوي

د افغانستان  په ختیځ ننګرهار  او په شمال کې په مزار شریف کې جلا جلا چاودنې شوي دي.

د ننګرهار ولایت نه د ترلاسه شوو معلوماتو له مخې  نن د سهار په ساعتونو کې  د خوږیانو ولسوالۍ د چمتلې  په سیمه کې  چاودنه وشوه.

پدې چاودنه کې  د ۷ تنو د ټپي کیدو نه خبر ورکړ شوی دی. سیمه ایزو مقاماتو ویلي دي چې چاودنه  په یو لاسي  ګاډي کې رامنځته شوې ده چې  چسپکي بم پکې نخلول شوی وو.

د بله پلوه  په مزار شریف ښار کې هم د یو چسپکي  بم چاودنه شوې.

د بلخ ولایت د پولیسو ویاند  عادل شاه عادل  خبري رسنیو ته ویلي دي چې پدې چاودنه کې یو تن مړ  او ۲ تنه نور ټپيان شوي دي.

په مزار کې  چسپکي بم  په یو بایسکل کې ځای په ځای شوی وو. دا چاودنه د مزار شریف د استیناف  محکمې  ترڅنګ  رامنځته شوې ده . ویل کیږي  د چاودنې  اصلي هدف  امنیتي ځواکونه او د عاشورا ویرجن ول.