د طالبانو د عسکري شورا غړی په پیښور کې ووژل شو

په پاکستان کې د افغاني طالبانو یو جګپوړی چارواکی  د نامعلومو کسانو لخوا په ډزو ووژل شو.

د ترلاسه شوو معلوماتو له مخې  د پاکستان د خیبرپښتونخوا په مرکز  پیښور کې  د افغاني طالبانو جګپوړی  چارواکی  قاري سید مراد په یو وسله وال برید کې ووژل شو.

د پاکستاني رسنیو د خبر له مخې  قاري  سید مراد  پیښور د ناصر باغ  روډ په سیمه کې  وژل شوی دی .

برید کوونکي  قاري مراد  د ناصر باغ روډ  په سیمه کې د خپل کور  ترڅنګ  وژلی دی .

برید کوونکی  د برید نه وروسته په تیښته بریالی شوی دی . قاري سید مراد  د طالبانو د عسکري شورا غړی  وو.

دا لومړی ځل ندی چې  د طالبانو جګپوړی چارواکی په پاکستان کې وژل کیږي. یوه لنډه موده  وړاندې  د طالبانو پخوانی  مشر  ملا اختر منصور  هم  په پاکستان کې د امریکا د پیلوټه الوتکې په برید کې  وژل شوی وو.

طالبانو د قاري سید مراد  د وژل کیدو په اړه څه ندي ویلي .