طالبانو نوی مشر وټاکه

طالبانو  د ملا منصور د مړینې د خبر د تاییدولو نه وروسته  د نوي مشر د ټاکلو نه خبر ورکړ . طالبانو ملا هبت الله اخندزاده  د نوي مشر په توګه ټاکلی دی.

د طالبانو ویاند  ذبیح الله مجاهد  نن  د چارشنبې ورځ  د مې ۲۵مه نیټه  خبري رسنیو ته په استولي خبرپاڼه کې  د  امریکا د بې پیلوټه الوتکو په برید کې د ملا اختر منصور د مړینې پخلی  کړی  او  د هغه د ځای ناستي د ټاکل کیدو نه خبر ورکړی دی .

د طالبانو لخوا په خپره شوې خبرپاڼه کې راغلي دي چې  د طالبانو شورا د ملا اختر منصور د مړینې نه وروسته  د سلا مشورو نه وروسته  شیخ الحدیث مولوي هبت الله اخندزاده د هغه د ځای ناستي او مشر په توګه د ټاکلو پریکړه وکړه.

په خبرپاڼه کې راغلي دي چې  شورا مولوي سراج الدین حقانی او  مولوي محمد یعقوب  د هغه د مرستیالانو په توګه ټاکل شوي دي.

مولوي هبت الله اخندزاده څوک دی ؟

د مولوي هبت الله په اړه ډیر زیات معلومات په لاس کې نشته . د ملګرملتونو  د تیر کال د راپور له مخې  هبت الله اخندزاده  د طالبانو  د سترې محکمې ریس وو. مولوي هبت الله  په اصل کې  نظامي  او د جګړې  تجربه نلري  . نوموړي د قضا  په برخه کې  د طالبانو  د یو مشر په توګه  دنده  درلوده. د ویلو ده چې  مولوي هبت الله د طالبانو د بنسټ ایښودونکو نه  یو  دی. د افغانستان د ملي امنیت د پخواني  ریس  په وینا  هغه  ۵۶ کاله عمر لري  او د جګړې په برخه کې هیڅډول تجربه نلري.

مولوي هبت الله اسلامي زده کړې کړي دي . ځیني  برخې وایي چې  هبت الله  د ملا اختر منصور په پرتله  یو اندازه  معتدله  او منځلاره  دی  . خو ځیني برخې بیا وايي چې  نوموړی  وچ  ملا دی  او طالبانو ته د جګړې  فتواګانې هم  د همدې لخوا ورکول کیدې. ناهیلې  برخې بیا وايي کیدای شي چې  د هبت الله د ټاکلو سره د افغان حکومت او طالبانو ترمنځه د سولې مذاکرات  په ټپه ودرول شي.

خو  ځینې هیله مند  برخې بیا وايي چې نوموړی  ښې اسلامي زده کړې لري چې د همدې امله د جګړې پر ځای به سولې ته ترجیح ورکړي.

ځیني نور سیاسي کارپوهان  بیا وايي  دا چې ملا هبت الله نظامي  او  د جګړې  تجربه نلري او د ملا محمد عمر زوی هم  لا ډیر ځوان  دی  د همدې امله  نوموړی به  سمبولیکه بڼه ولري او اصلي مشري به  سراج الدین حقاني  کوي. سیاسي کارپوهان وايي دا ځکه چې  د حقاني شبکه په طالبانو کې تر ټولو غښتلې  او پیاوړې شبکه ده او ډیر زیات نفوذ هم  لري.

طالبانو د خپل نوي مشر ملا هبت الله اخندزاده  یو عکس هم  خپور کړی دی .