د ترکیې د ورځپاڼو سرټکي

د صباح ورځپاڼې « چاوش اوغلو : د ادانا مطابقت زمونږ  په ګټه  دی »  د سرلیک لاندې لیکلي دي، د ترکیې د بهرنیو چارو وزیر مولود چاوش اوغلو د ترکیې او سوريې ترمنځه  لاسلیک شوی د ادانا د مطابقت  جزیاتو په اړه معلومات ورکړل. هغه وویل چې  که چیرې  مقابل لوری  ددې مطابقت  له مخې  لازم  ګامونه اوچت نکړي  دا مطابقت  ترکیې ته د سوریې په خاوره کې  د پوځي عملیاتو  حق  ورکوي. هغه وویل که چیرې دا تړون  په ډیره ښه توګه  عملي شي  دا زمونږ په ګټه  دی.

د خبرترک ورځپاڼې « ترکیې د قبرس په اړه د ملګروملتونو د امنیت شورا د پریکړې په اړه  سخت غبرګون وښود »  د سرلیک لاندې لیکلي دي، د ترکیې د بهرنیو چارو وزارت د جنوري په ۳۰ مه نيټه  د ملګروملتونو د امنیت شورا لخوا په قبرس کې د ملګروملتونو  د سوله ساتو ځواکونو د ماموریت د مودې د غځولو د پریکړې په اړه  غبرګون وښود. د ترکیې د بهرنیو چارو وزارت ویلي دي چې دا ګام  د قبرس د روانې ستونزې د حل سره  کومه مرسته نکوي. همداشان  په قبرس کې  د سوله ساتو ځواکونو  ماموریت د مودې د غځولو په اړه د شمالي قبرس ترکي جمهوریت سره  هیڅډول سلا مشوره نده شوې. دا تر ټولو ستره  اشتباه  او کمبودي ده. په قبرس کې باید په هره مسله کې  د شمالي او سویلي قبرس  ترمنځه تبعیض  ونشي.

د ینې شفق ورځپاڼې « صادرات  لوړ شوي »  د سرلیک لاندې لیکلي دي، د ترکیې صادراتو د ۲۰۱۸ کال کې د دسمبر په میاشت کې هم  ودې ته دوام ورکړ. د ترکیې د احصایې ادارې د سوداګرۍ د وزارت په همکارۍ  د ۲۰۱۸ کال اړوند د بهرني تجارت موقت  ارقام  اعلان کړ. د نوموړو  ارقامو  له مخې  په ۲۰۱۸ کال کې د ترکیې صادرات د تیر کال په پرتله  د ۷ سلنې په ډیریدو سره  ۱۶۸ میلیارده او ۲۳ میلیونه ډالرو ته  لوړ شوي دي. همداشان  اروپايي ټولنې ته د ترکیې صادراتو د دسمبر په میاشت کې هم  وده کړې ده . ویل کیږي تر ټولو ډیر صادرات  جرمني ته شوي دي.

د حریت ورځپاڼې  « روسيې ته  ۳۰ میلیونو ډالرو په ارزښت ټماټر صادر شوي دي » د سرلیک لاندې لیکلي دي، ترکیې په ۲۰۱۸ کال کې  روسیې ته  ۳۷ زره ۱۰۷ ټنه  ټماټر  صادر کړي دي. د ویلو ده چې ترکیې په ۲۰۱۷ کال کې  روسیې ته  ۲۰۷۵ ټنه  ټماټر صادر کړي وو.

د وطن ورځپاڼې لیکلي دي په ۲۰۱۸ کال کې ترکیې ته د هیواد نه بهر میشت ترکانو سره  جمعآ  ۴۶ میلیونه  ۱۱۲ زره او ۵۹۲ تنه  سیلانیان  راغلي دي. د ترکیې د کولتور او ګرځندوی د وزارت د شمیرو له مخې  د ګرځندوی سکتور په ۲۰۱۸ کال کې  ۲۹ میلیارده ۵۱۲ میلیونه او ۹۲۶ ډالره عواید ترلاسه کړي دي. ویل کیږي په ۲۰۱۸ کال کې  ترکیې ته  تر ټولو  ډیر  د روسیې  وګړي راغلي دي. په ۲۰۱۸ کال کې  ۵ میلیونه ۹۶۴ زره او ۶۱۳ تنه روسان  د رخصتۍ په خاطر  ترکیې ته راغلي دي. همداشان جرمني په دویم  او بلغاریا په دریم کتار کې ځای لري.