د ترکیې د ورځپاڼو سرټکي

د سټار ورځپاڼې  «  ترکیه به لازم ګام  اوچت کړي  »  د سرلیک لاندې لیکلي دي ، د ترکیې لومړی وزیر بنعلي ییلدرم  چې د دوه ورځني سفر په ترڅ کې عراق ته تللی وو بیرته هیواد ته راستون شو. په خبر کې راغلي دي چې لومړي وزیر ییلدرم  عراق نه د راستنیدو نه وروسته د انقرې د ایسن بوغا  په هوايي ډګر کې خبریالانو ته وویل چې « د عراق د حکومت سره  د ترهګرو ډلو او سازمانونو پر خلاف د ګډې مبارزې په برخه کې په تفاهم  ورسیدو. »

هغه  د عراق د بعشیقه  په سیمه کې د ترکیې د وسله والو ځواکونو د موجودیت په اړه د پوښتنې په ځواب کې وویل «  په بعشیقه کې د ترکیې د وسله والو ځواکونو د موجودیت یواځنی  لامل  د ترهګرو پر وړاندې مبارزه ده. ترکیه  بله کومه موخه  نلري. عراقي چارواکیو ته مو  دا خبره په ټينګار سره  وکړه. د عراق د سینجار په سیمه کې  د پې کاکا ترهګرې ډلې  د ځای په ځای کیدو په مسلې مو هم  په اړخیزه توګه خبرې وکړې. په ښکاره توګه مو وویل چې یا به د عراق ځواکونه او یا پيشمرګه ځواکونه  پې کاکا ترهګره ډله  د سینجار سیمې نه  وباسې  او که نوي ترکیه به  پدې برخه کې  څه چې لازم  وي هغه به وکړي. »

د خبرترک ورځپاڼې  «  د قبرس په اړه د جینیوا مهمه  سرمشریزه »  د سرلیک لاندې لیکلي دي، د قبرس د روانې ستونزې د حل په خاطر  د شمالي قبرس ترکي جمهوریت  ولسمشر مصطفی اکنجي  او د قبرس د سویلي ادارې  مشر نیکوس د ملګروملتونو د سازمان په مشرۍ په جینیوا کې  غونډه کوي. په خبر کې راغلي دي چې  دواړه خواوې به  د جنوري په ۱۱ مه نيټه  خپل وړاندیزونه  وړاندې کړي. همداشان د جنوري په ۱۲مه نیټه به د ترکیې ، یونان او انګلستان مشران هم  د ضمانت کوونکو هیوادونو په توګه  پدې سرمشریزه کې ګډون وکړي.

د حرییت ورځپاېې  «  ساره قمش  ۲۰۱۷  »  د سرلیک لاندې لیکلي دي د ترکیې  د قارس ولایت د ساره قمش  په ولسوالۍ کې  د لومړنۍ نړۍوالې جګړې پر مهال  د الله اکبر په غرونو کې  د سختې یخنۍ  په پایله کې  د شهیدو شوو  ۹۰ زرو تنو ترکي  سرتیرو  ۱۰۲ م تلین د ځانګړو مراسمو په ترڅ کې  لمانځنل شو. په خبر کې راغلي دي چې  د هیواد د څلورو ګوډونو نه  څه بانډې  ۲۵ زره تنه په ساره قمش ولسوالۍ کې سره ټول  او د الله اکبر غرونو ته  چیرته  چې  ترکي سرتیري په شهادت رسیدلي وو  لاریون وکړ. پدې لاریون کې  د ترکیې د سپورت او ځوانانو وزیر عاکف چغتای کلچ او د ټرانسپورت سمندري چارو او معلوماتو وزیر احمد ارسلان هم  ګډون کړی وو. لاریون کوونکو د سختې سړې هوا  سره سره  ۸ کیلومتره  په واټن  لاریون وکړ  او د شهیدانو نه  يي  د الله اکبر په غرونو کې  یادونه وکړه.

د صباح ورځپاڼې  «  د چای په اصلي ټاټوبي  کې  د ترکیې چای ته جایزه  »  د سرلیک لاندې لیکلي دي ، په جاپان کې د شنو چای  په سیالۍ کې  د ترکیې  چای  لومړنی  مقام  خپل کړ. پدې سیالۍ کې  د چین، کوریا ، جاپان  او ترکیې د چای فابریکو ګډون کړی وو. د ترکیې چای پدې سیالۍ کې  دوه د سروزرو مډالونه وګټل.