د ترکیې د ورځپاڼو سرټکي

د صباح ورځپاڼې « د ترکیې  پرمختګ   »  د سرلیک لاندې لیکلي دي ، د ترکیې ولسمشر رجب طیب اردوغان  وویل چې ، « ترکیه  لکه څرنګه چې د امنیتي مسلو د حل په برخه کې  هلې ځلې کوي  پر څنګ کې د هیواد  پرمختګ او ودې  ته هم  دوام  ورکوي. ترکیې  دا خبره  ټولو ته په اثبات  رسولې ده . پدې وروستیو کې په ترکیه کې  پرله پسې ترهګریز بریدونه  او اقتصادي  فشارونه  دا ټول  په نړۍواله کچه کې د ترکیې د بریالیتوب سره تړاو لري. د ترکیې دښمنان زمونږ  دا ستر بری  زغملی  او لیدلی نشي. هیڅوک  د ترکیې  د ۲۰۲۳ کال د هدفونو پر وړاندې  خنډ  نشي  جوړولی.»

ولسمشر اردوغان  ترکیې خلکو ته  یو زیری هم  ورکړ. هغه وویل چې  د OECD  نړۍوال سازمان  د ترکیې په ګډون  ۸ هیوادونه د متوسطو عوایدو لرونکو نه  لوړ عوایدو لرونکو هیوادونو په کتارکې داخل کړل.

د سټار ورځپاڼې  « د فتح الله ګولن سازمان د داعش او بوکوحرام په څیر  ترهګریز سازمان  دی  »  د سرلیک لاندې لیکلي دي، د ترک امریکن  کمیټې  د امریکا  د شیکاګو په ښار کې  د امریکايي مسلمانانو په کانګره کې  په ترکیه کې د جولای د ۱۵ مې  ناکامې کودتا  د اتلو  شهیدانو په اړه  ځانګړې غونډه وشوه. د ترکیې  د ښځو او ډیموکراسۍ د ملکي ټولنې  مرستیالې  سمیه اردوغان  پدې غونډه کې  د خپلې وینا په ترڅ کې  د جولای د ۱۵ مې کودتاچیانو پر وړاندې د خلکو د مقامت  په اهمیت  خبرې وکړې. هغې  وویل چې  د فتح الله ګولن ترهګریز سازمان  د داعش او بوکوحرام په څیر  یو سخت دریځه  او افراطي  ترهګریز  سازمان  دی. که چیرې  په خپل وخت  ددې ترهګریز سازمان  د مخنیوي په خاطر  لازم  ګامونه پورته نشي ټولې نړۍ ته به جدي ګواښ مخامخ کړي.

د خبرترک ورځپاڼې  «  ایتلافي ځواکونو د داعش پر خلاف په مبارزه کې ترکیه یواځې پریښوده  » د سرلیک لاندې ، د ترکیې د ولسمشر ویاند  ابراهیم قالن  وویل چې  نړۍوالې ټولنې او نړۍوال ایتلاف  د داعش پر خلاف په مبارزه کې ترکیه یواځې پریښوده. هغه  په ځانګړې توګه  د سوریې د الباب په سیمه کې د داعش پر خلاف د روانې مبارزې په برخه کې  د ترکي ځواکونو نه د ملاتړ د نه ترسره کولو له امله په نړۍوالې ټولنې او نړۍوال ایتلاف سختې نیوکې وکړې.

هغه زیاته کړه چې ترکیې  د اګست په ۲۴ مه نیټه د سوریې په شمال کې د فرات سپر په نامه د پیل کړو عملیاتو په ترڅ کې  ۱۹۰۰ کیلومتره  سیمه  د داعش ترهګرې ډلې  د شر نه  ژغورلې ده . هغه وویل چې  د نړۍوال ایتلاف لخوا  پدې عملیاتو کې د ترکیې نه  د هوايي ملاتړ نه ترسره کول  د منلو وړ خبره نده. هغه  زیاته کړه که چیرې دوی مرسته وکړي او که نه  ترکیه  به د فرات سپر په نامه  عملیاتو ته په همدې شان دوام ورکړي او سیمه به د داعش نه وژغوري.

د ینې شفق ورځپاڼې  « د الباب نه وروسته د منبیج پلان هم  تیار  دی  »  د سرلیک لاندې لیکلي دي ، د ترکیې  لومړني  کوماندو ځواکونه   د الباب  ښار ته  داخل شول. په خبر کې راغلي دي چې  نوموړي  ځواکونه  د داعش نه تصفیه شوې سیمې  د ماینونو د پاکوي. په خبر کې راغلي دي چې ترهګرو په ټولو هغو سیمو کې چې  د لاسه يي ورکوي  په کورونو کې په ډیر مسلکي ډول سره  ماینونه ځای په ځای کوي. د ترکیې وسله وال ځواکونه  او ازادې سوریې ځواکونه  دا ماینونه یو یو شنډوي او سیمه  پاکوي. په خبر کې راغلي دي چې  د الباب  د نیولو نه وروسته وار  سوریې د منبیج  د سیمې دی چې  د پې کاکا ترهګرې ډلې د څانګې پي وای ډي تر کنټرول لاندې دی. د منبیج د حرکاتو په خاطر  پلان  جوړ شوی دی . د پلان له مخې د الباب د نیولو نه وروسته به د لسو ورځو په دننه کې د منبیج  عملیات پیل شي.

د بله پلوه  امریکا  متحده ایالتونه د پې وای ډي ترهګرې ډلې ته  د الوتکو ضد وسلې ورکولو ته تیاری نیسي. د پي وای ډي سره د الوتکو د ضد وسلې مرسته په اصل کې  د ترکیې په مقابل کې  د ترهګرو نه  ملاتړ کولو ښکارندويي کوي. ځکه چې  داعش ترهګره ډله الوتکې نلري .