Рахметолла Райымқұловтың түрік тіліне аударылған кітабы таныстырылды
Артынан қатысушылар «ТҰРАН» этно-фольклорлық музыкалық тобының шағын концертін тыңдады.
Түрік мәдениетінің халықаралық ұйымы Түріксойдың Анкарадағы штаб-пәтерінде Рахметолла Райымқұловтың түрік тіліне аударылған кітабы таныстырылды.
Қазақстанның Түркиядағы елшілігі және Еуразия Жазушылар одағымен бірлесе отырып белгілі қазақ жазушысы Рахметолла Райымқұловтың туғанына 110 жыл толуына арналған конференция және түрік тіліне аударылған «Жасыл белес» кітабының тұсаукесері ұйымдастырылды.
Шарада Түріксой Бас хатшының орынбасары Сайит Юсуф «Биыл 30 жылдық мерейтойымызды тойлап жатырмыз. 30 жыл бойы өз мәдениетімізді барынша насихаттауға атсалысып келеміз, алдағы уақытта да жалғастырамыз. Әрине, бұл істерді жалғыз емес, Түрік әлемінің құнды тұлғаларымен, Түркиядағы үкіметтік емес ұйымдармен, ғалымдармен және басқа да бауырлас ұйымдармен бірлесе отырып жүргізіп келеміз» деді.
Қазақстан елшілігінің бірінші хатшысы, консул Нышангүл Қаратаева сөзінде қазақ жазушы Рахметолла Райымқұловтың маңызды шығармалары мен оның атқарған жұмыстарына тоқталды. Қаратаева «Бүгін біз өткенді еске алып, болашаққа қадам басамыз. Әсіресе ата-баба мұрасы туралы сөз қозғағанда оның сабақтастығын қамтамасыз ету маңызды деп санаймыз. Алаш қозғалысының негізін қалаушы Ахмет Байтұрсынұлы: «Ең ұлы сөз – тарих» деген. Сондықтан да өткенге көз жүгірткеніміз маңызды, өйткені өткен – бүгінгі күннің негізі. Өткенімізді жақсырақ білу үшін бүгін қазақтың көрнекті жазушысы Рахметолла Райымқұловтың өмір жолына үңілеміз. «Ата-бабамыз қалдырған тарих – бізге қалдырған маңызды мұра” деді.
«Қазақконцерт» басшысы Ақтоты Райымқұлова өз сөзінде алдымен Түркия Республикасының 100 жылдығы және Түріксой ұйымының 30 жылдығымен құттықтады.
Әкесі Рахметолла Райымқұловтың 110 жылдығына орай өткізілген конференцияға және түрік тіліне аударылған «Жасыл белес» кітабының тұсаукесеріне ризашылығын білдірген Ақтоты Райымқұлова әкесінің саналы ғұмырын халқының ағарту ісіне арнағанын айтып, шығармаларында жастарды жақсы тәрбиелеу, қоршаған ортаға сезімталдық сияқты мәселелерге ерекше тоқталғанын атап көрсетті.
Құттықтау сөздерден кейін «Жасыл белес» кітабының лентасы қиялды.
Артынан қатысушылар қазақстандық танымал «ТҰРАН» этно-фольклорлық музыкалық тобының шағын концертін тыңдады.
Ұқсас жаңалықтар
Әлиев пен Жапаров Ағдам қаласына барды
Басшылар Хыдырлы ауылында Қырғызстан тарапынан салынатын мектептің іргетасын қалады.
