Зеленский Сауд Арабиясында

Украина Президенті Владимир Зеленский Сауд Арабиясының мұрагер ханзадасы Мұхаммед бен Салманмен кездесті.

Сауд Арабиясы ақпарат агенттігінің (SPA) хабарлауынша, Зеленскийді және онымен бірге келген делегацияны ел астанасы Эр-Риядтағы Король Халид атындағы халықаралық әуежайында Эр-Рияд әмірі міндетін атқарушы ханзада Мұхаммед бен Абдулрахман бен Абдулазиз қарсы алды.

«Al Arabiya» телеарнасы Зеленскийдің сапары барысында тақ мұрагері Мұхаммед бен Салманмен кездескенін хабарлады.

Кездесу барысында екіжақты қарым-қатынастар қарастырылып, ынтымақтастықты нығайту және «Ресей-Украина дағдарысын» шешу жолындағы диалог мүмкіндіктері талқыланғаны атап өтілді.

Зеленский мамыр айында да Сауд Арабиясына барған еді.

Эр-Рияд дағдарысты шешу және Ресей мен Украина арасындағы тұтқын алмастыруда рөл атқарған болатын.

Алдыңғы күні Эр-Риядта Ресей парламентінің төменгі палатасы Мемлекеттік Думаның төрағасы Вячеслав Володин де мұрагер ханзада бен Салманмен кездескен еді.