исраилийә әскәрлири мухбирларни йариландурди
исраилийә әскәрлириниң оқ чиқириши нәтиҗисидә анадолу агентлиқи мухбириниму өз ичигә алған 3 журналист йариланди.
түркийә авази радийоси хәвири: ишғал астидики ийордан дәрйасиниң ғәрбий қирғиқиға җайлашқан рамаллаһта исраилийә әскәрлириниң пәләстинликләргә мудахилисини көзитиватқан анадолу агентлиқиниң фото сүрәт мухбириниму өз ичигә алған 3 журналист исраилийә әскәрлириниң оқ чиқириши нәтиҗисидә йариланди.
рамаллаһниң ғәрбидики рас қарқар йезисида йүз бәргән вәқәләрни көзитиватқан анадолу агентлиқиниң фото сүрәт мухбири ислам римави, фирансийә хәвәр агентлиқи (AFP) ниң мухбирлиридин аббас мөмини билән әнглийә пуқраси җо дайке исраилийә әскәрлириниң оқ чиқириши нәтиҗисидә йариланди.
мәлуматларға қариғанда, йариланған мухбирларниң саламәтлик әһвали йахши икән.
йәһудий көчмәнләр йеқиндин буйан йеңи олтурақ мәһәллилири бәрпа қилиш үчүн рас қарқарда пәләситнликләргә аит земинлар үстидә йол йасаватқан болуп, буниңға қарши чиқиватқан пәләситнликләр билән йәһудий көчмәнләрни қоғдаватқан исраилийә әскәрлири оттурисида тоқунуш йүз бәрмәктә икән.
исраилийә 1967 – йилдин буйан ишғал астидики ийордан дәрйасиниң ғәрбий қирғиқи вә шәрқий қуддуста қанунсиз һалда йүзләрчә олтурақ мәһәллилирини бәрпа қиливатқан болуп, ийордан дәрйасиниң ғәрбий қирғиқидики олтурақ районлирида тәхминән йерим милйон, шәрқий қуддуста болса 220 миң йәһудий көчмән йашайдикән. хәлқара қанунға асасланғанда, ишғал астидики земинларда бәрпа қилинған барлиқ йәһудий олтурақ районлири қанунсиз һесаблинидикән.
