түркийәдә пәләстин шеһитлири үчүн үч күнлүк «миллий матәм»  елан қилинди

түркийә авази радийоси хәвири: җумһур рәис рәҗәп таййип әрдоған аммиви ортақлишиш тор бетидики сәһиписидә, бу һәқтә елан қилған байанатида мундақ деди:

«түркийә болуш сүпитимиз билән, пәләстинлик қериндашлиримиз баштин кәчүрүватқан қорқунчлуқ азаб - оқубәтләрни чоңқур һес қиливатимиз. көпинчиси балилар вә бигунаһ пуқралардин тәшкил тапқан миңлиған шеһитлиримизға болған һөрмитимизниң намайәндиси сүпитидә дөлитимиздә үч күнлүк <миллий матәм> елан қилинди.»

әрдоғанниң байанатида, түркийәниң «миллий матәм» қарариғиму орун берилди.

түркийәниң үч күнлүк «миллий матәм» һәққидики қарарида, исраилийәниң пуқраларни нишан қиливатқан, 2023 – йили 17 – өктәбир күни дохтурханиға қилған һуҗумлири нәтиҗисидә адәм өлүш вә йарилиниш әһвалиниң көрүлгәнлики, бу мунасивәт билән пәләстин хәлқиниң қорқунчлуқ азаб – оқубәтлири һәм дәрд – әләмлирини ортақлишиш мәқситидә үч күнлүк «миллий матәм елан қилинғанлиқи» әскәртилди.

қарарда, 2023-йили 21 – өктәбир шәнбә күн патқанға қәдәр, дөләт миқйасида вә түркийәниң чәт әлләрдики әлчихана-консулханилирида түркийә байриқиниң йерим чүшүрүлидиғанлиқи тәкитләнди.

исраилийә ғәззәниң мәркизидики әләһли баптист дохтурханисини бомбардиман қилған, бу қирғинчилиқта 471 пуқра җенидин айрилғаниди.

исраилийәниң 7-өктәбир күни башланған һуҗумлирида 3000 дин артуқ пәләстинлик җенидин айрилди. 12 миң 500 дин артуқ адәм йариланди.