әрдоған: киродийә мусулманларға әркинлик муһити йаритип бериш җәһәттин үлгилик дөләтләрдин бири
дөлитимиз (түркийә җумһурийити) җумһур рәиси рәҗәп таййип әрдоған киродийәниң мусулманларға әркинлик, һөрмәт қилиниш вә һузур муһити йаритип бериш җәһәттин йавропадики үлгиллик дөләтләрдин бири икәнликини ейтти.
түркийә авази радийоси хәвири: җумһур рәис әрдоған, дөләт ишлири зийаритидә болуватқан киродийәниң пирезиденти заағребта, киродийә пирезиденти зоран миланович билән айрим вә һәйәтләр ара учришишларни елип барғандин кейин, бирләшмә ахбарат елан қилиш йиғини өткүзди.
у бу йәрдә қилған сөзидә, учришишларда икки тәрәп мунасивәтлири һәққидә кәң даирилик музакирә елип барғанлиқлирини, һәмдә райондики өзгиришләр вә 24 – феврал күни башланған русийә – украина уруши һәққидә өзара пикир алмаштурғанлиқлирини қәйт қилди.
украина портлиридин ашлиқ йөткәш мәсилиси тоғрилиқму тохталған әрдоған, һазирчә русийә тәрипидин ашлиқ йөткәш хизмитиниң башланмиғанлиқини, лекин түркийәниң русийәдинму ашлиқ йөткишини башлишини күтүватқанлиқини әскәртти, һәмдә русийә пирезиденти виладимир путинниң ашлиқ йөткәш мәсилисидә һәқлиқ тәрипиниң барлиқини тәкитләп мундақ деди: «толиму әпсуски, тошулуватқан ашлиқлар намрат дөләтләргә әмәс, әксичә бай дөләтләргә кетиватиду. ашлиқ йөткәштики мәқсәт немә? намрат дөләтләргә давамлиқ ашлиқ тошуштур, буни үзлүксиз давамлаштуруштур. нөвәттә, бир тәрәптин, русийәгә ембарголар давамлишиватқан бир пәйттә, бу ембарголарға қаримай бу ембарголарни йүргүзүватқан дөләтләргә ашлиқ тошулуши, пирезидент путинниму биарам қилмақта.»
бу мәсилиниң һәл қилиниши үчүн өзбекистанниң сәмәрқәнт шәһиридә 15 – 16 – сентәбир күнлири чақирилидиған шаңхәй һәмкарлиқ тәшкилати башлиқлар йиғинида, путин билән бу һәқтә музакирә елип баридиғанлиқлирини ейтқан җумһур рәис әрдоған, мундақ дәп көрсәтти: «шуни үмид қилимизки, русийә тәрипидинму ашлиқ йөткәш хизмитини башлитайли вә һәқиқий намрат дөләтләргиму бу ашлиқларни йәткүзәйли.»
җумһур рәис рәҗәп таййип әрдоған, кейинчә сисақта ислам мәдәнийәт мәркизиниң ечилиш мурасимиға қатнашти, һәмдә бу йәрдә қилған сөзидә, киродийәниң мусулманларға әркинлик, һөрмәт қилиниш вә һузур муһити йаритип бериш җәһәттин йавропадики үлгиллик дөләтләрдин бири икәнликини тәкитләп мундақ деди: «шәк – шүбһисизки, бу әркинлик вә һузур муһити пәқәт мусулман қериндашлиримиз үчүнла әмәс, башқа динлар вә мәдәнийәтләр үчүнму күчкә игә. бүгүн биз ечилишини ишқа ашурған сисақ ислам мәдәнийәт мәркизиму һәм киродийәниң бу үлгилик орниниң, һәмдә сисақ шәһириниң көп мәдәнийәтлик қурулмисиниң символлиридин бир сүпитидә мәвҗудийитини давамлаштуриду.»
