русийә әлчиси түркийәниң мурәссәчилик ролиға чин дилидин әһмийәт беридиғанлиқини ейтти
русийәниң әнқәрәдә турушлуқ баш әлчиси алексей йәрхов түркийәниң русийә билән украина оттурисидики мурәссәчилик ролиға чин дилидин әһмийәт беридиғанлиқини билдүрди.
түркийә авази радийоси хәвири: совет иттипақиниң иккинчи дунйа урушида натсист германийәсини мәғлуб қилғанлиқиниң 77 - йиллиқи, русийәниң әнқәрәдә турушлуқ баш әлчиханиси тәрипидин пайтәхт әнқәрәдики русийә өйидә тәбрикләнди.
баш әлчи алексей йәрхов 9-май ғәлибә күни паалийәтлири даирисидә өткүзүлгән ечилиш мурасимида, түркийә - русийә мунасивәтлири үстидә тохтилип, икки дөләт оттурисида хушал бир кәлгүси бәрпа қилишниң давамлишидиғанлиқини ейтти.
алексей йәрхов түркийәниң русийә билән украина оттурисида үстигә алған мурәссәчилик ролиниң муһимлиқини тәкитләп, мундақ деди:
«интайин сәмимийлик билән шуни билдүрмәкчимәнки, биз түркийәниң нөвәттики җәрйанға қошқан төһписи вә ойниған мурәссәчилик ролиға чин көңлимиздин әһмйәт беримиз вә уни қәдирләймиз. ташқи ишлар министиримиз сергей лавровниң украиналиқ мәнсәпдиши билән анталйада өткүзгән учришиши вә түркийә җумһур рәиси рәҗәп таййип әрдоғанму қатнашқан долмабаһчә сарийидики башқа учришишларға қатнашқанлиқимиз, түркийәниң мурәссәчиликини қанчилик қәдирләйдиғанлиқимизни көрситиду» деди.
алексей йәрхов тинчлиқ сөһбитиниң қисқа вақит ичидә нәтиҗилинишини үмид қилидиғанлиқини сөзлиригә илавә қилди.
русийә қисимлири 24- февралда украинаға һуҗум башлиған болуп, андин һәр қайси тәрәпләр оттурисида түркийәниң саһибханлиқида бир қатар музакириләр елип берилған иди.
