әрдоған: хаталиқни өзимиздин издишимиз лазим

түркийә авази радийоси хәвири: җумһур рәис рәҗәп таййип әрдоған малайшийаниң саһибханлиқида өткүзүлгән куала лумпур дөләт башлиқлири йиғинида муһим сөз қилди.

у йиғинда, 50 дин артуқ дөләттин кәлгән 650 вәкилгә хитаб қилди. йиғинға, иран пирезиденти һәсән руһани вә қатар әмири тамим бин һамад алтаниму қатнашти.

у б д т хәвпсизлик кеңиши қурулмисиниң өзгәртилиши керәкликини тәкитләп: «2-дунйа урушиниң ғалиплири тәрипидин өзиниң мәнпәәтлирини қоғдаш үчүн қурулған вә 1.7 милйард кишиниң тәқдирини бәш дөләтниң ихтийариға ташлап қойған системиниң өмри ахирлашти» деди.

у б д т хәвпсизлик кеңиши системисиниңла әмәс, бәлки ислам һәмкарлиқи тәшкилатиниңму йеңилиниши керәкликини тәкитлиди. у мундақ деди:

«ислам дунйасини учраштуридиған мунбәрләрниң әң чоң қийинчилиқи иҗра қилиштики кәмчилликидур. бу пәләстиндә илгириләш һасил қилалмиғанлиқимизниң, мәзһәпчилик қилиш билән җуғрапийәмизниң парчә-парчә қилинишиға <тохта> дейәлмигәнликимизниң сәвәби. әслидә, ислам дунйаси аҗиз вә чарәсиз әмәс.»

у ислам дунйасини тәнқид қилип: «шунчивала имканийәтләргә, нефитқа, нопусқа вә тәбиий байлиқларға игә болуп туруқлуқ, техичә мусулманларниң көп қисми кәмбәғәллик вә җаһаләткә қарши күрәш қиливатқан болса, ундақта хаталиқни өзимиздин издишимиз лазим. ислам дунйаси мол енергийә байлиқлириға игә болған болсиму, 350 милйон мусулман ачарчилиқ астида йашаш үчүн күрәш қилмақта. әң бай мусулман дөлити билән кәмбәғили оттурисидики пәрқ 200 һәссидин артуқ. дунйа миқйасида саватлиқларниң нисбити %82.5 болған болса, ислам дунйасида бу рәқәм %70 әтрапида.» деди.

у районда йүз бериватқан тоқунушларниң ахирлишиши керәкликини әскәртип: «дунйа миқйасида йүз бериватқан тоқунушларда өлгәнләрниң %94 и мусулманлар. һазир дунйада сетилған һәр үч қоралдин бири оттура шәрққә сетилиду. мундақчә ейтқанда, мусулманлар бир-биригә оқ етиватқанда, бейиватқанлар ғәрб қорал содигәрлири болмақта» деди.