чавушоғлу түркийәниң терроризмға қарши күриши тоғрисида тохталди

түркийә авази радийоси хәвири: мәвлүт чавушоғлу түркийә бүйүк милләт мәҗлиси (парламенти) дики министирлиқниң хамчотиға алақидар йиғинда сөз қилди. у сүрийә чеграсидики өзгиришләр тоғрисида тохтилип, «й п г / п к к вә даеш түркийәгиму хәвп шәкилләндүрмәктә. шуңа чеграйимизниң у тәрипидики террорлуқ тәшкилатлирини бир тәрәп қилиш бурчимиздур» деди.

мунбич йол хәритисиниң утуқлуқ иҗра қилиниши вә фират дәрйасиниң шәрқигиму вақтида өтүш үчүн америка қошма иштатлири билән музакирә өткүзүлүватқанлиқини тәкитлигән чавушоғлу, «мунбич йол хәритисиниңму алдимиздики күнләрдә тамамлинидиғанлиқиға ишинимиз» деди.

түркийәниң терроризмға қарши күрәш ирадисиниң қәтийликини йәнә бир қетим тилға елип өткән чавушоғлу, фәтһуллаһчи террорлуқ тәшкилати әзалирини йошурунувалған дөләтләрдин түркийәгә қайтуруп келиш хизмәтлириниң давамлишиватқанлиқини әскәртти.

у, йавропа иттипақи – түркийә мунасивәтлириниң нөвәттики әһвали үстидиму тохталди؛ «йавропа иттипақи бизгә нисбәтән һелиһәм истратегийәлик нишандур. бирақ, биарамлиқ һес қилған нуқтиларни тартинмастин оттуриға қойуватимиз» дегәнләрни қәйт қилған чавушоғлу,  «визини қойуветишни қолға кәлтүрүшимиз лазим. бу бизниң пуқралиримизниң һәққидур. таможна иттипақиму вақтида йеңилиниши керәк» деди.

2018 – йили 2 – өктәбир сәйшәнбә күни сәуди әрәбистанниң истанбулдики консулханисида вәһшийләрчә өлтүрүлгән сәуди әрәбистанлиқ журналист җәмал қашиқҗи җинайити тоғрисидиму тохталған министир чавушоғлу, җинайәтни айдиңлитишқа тиришиватқанлиқлирини сөзлиригә илавә қилди.