нато түркийә тоғрисида байанат елан қилди

түркийә авази радийоси хәвири: нато өткән һәптә норвегийәдә 8-17-нойабир күнлири арисида өткүзүлгән һәрбий маневирда түркийә җумһур рәиси рәҗәп таййип әрдоған билән мустапа камал ататүркниң рәсими қариға етиш тахтисиға есилған вәқәни тәкшүрүш ишлириниң давамлишиватқанлиқини билдүрди. бу һәқтә елан қилинған байанатта: «иккинчи бундақ вәқә йүз бәрмәйду» дейилди.

нато баш катипи столтенберг түркийәниң наразилиқиға сәвәб болған вәқәниң тәкшүрүлгәнликини вә бундақ вәқәниң қайта йүз бәрмәйдиғанлиқи тоғрисида ишәнч турғузғанлиқини ейтти.

баш катип столтенберг армийә мәсуллириниң вәқәни инчикә тәкшүргәнликини әскәртти вә мундақ деди:

«мәнму бундақ вәқәниң қайта йүз бәрмәслики үчүн бәлгилимиләрни тәкшүрүватимән, өткән һәптә ахири җумһур рәис рәҗәп таййип әрдоғанға телефон қилип, вәқә сәвәб болған көңүлсизликләр үчүн әпу соридим, натониң норвегийәдики вәқәниң җавабкарлирини сүрүштә қилиш үчүн дәрһал һәрикәткә өткәнлики тоғрисида униңға мәлумат бәрдим.»

столтенберг халифакс хәлқара бихәтәрлик мунбири йиғини җәрйанида түркийә армийә иштаб башлиқи һулусий акар вә йавропа иттипақи ишлири министири һәмдә баш музакирәчи өмәр чәлик билән көрүшкәндә әпу сорап, бундақ вәқәниң қайта йүз бәрмәйдиғанлиқи тоғрисида ишәнч турғузғанлиқини билдүрди.

у сөзидә, түркийәниң натониң муһим иттипақдиши икәнликини әскәртип: «түркийә, ирақ вә сүрийә чеграсида террорлуққа қарши күрәштә иттипаққа түрлүк йардәмләрни қиливатиду. охшаш вақитта йәнә, русийә чеграсида қара деңиздики паалийәтлиримиздә муһим иттипақдаш һесаблиниду. шуңа, түркийәниң иттипаққа қошқан төһписигә көп әһмийәт беримиз. бу сәвәбтин, бундақ вәқәниң қайта йүз бәрмәйдиғанлиқидин хатирҗәм болушимиз керәк» деди.

норвегийәдә өткүзүлгән һәрбий маневирда йүз бәргән сәтчиликтә ататүркниң рәсими қариға етиш тахтисиға есилған, җумһур рәис рәҗәп таййип әрдоғанни чүшәндүрүштә, «дүшмән дөләт рәһбәрлири» билән йеқин мунасивәттә болуп, һәмкарлиқ орнатқанлиқи дейилгән иди.