21.09.2017
бүгүнки түркийә гезитлиридә асасий салмақни игилигән хәвәрләр төвәндикичә:
түркийә авази радийоси: «сабаһ гезити», дөлитимиз җумһур рәиси рәҗәп таййип әрдоғанниң нийу йоркта блумберг йәр шари сода мунбиридә, түркийәниң русийәдин сетивелишни пилан қилған «S-400» башқурулидиған бомба қалқан системиси һәққидә сөз қилғанлиқини хәвәр қилди.
гезитниң хәвиридә, җумһур рәис рәҗәп таййип әрдоғанниң: «бир тәрипимиздики сүрийәдә S-400 бар болған йәрдә, мән S-400 гә, бәлки S-500 гә, һәтта S-600 игә болуш үчүн тиришишим керәк. булар өзимизни қоғдаш үчүн бесишқа тегишлик қәдәмләр һесаблиниду» дегәнлики билдүрүлди.
«һөррийәт гезити», түркийә армийәсиниң һабур чегра еғизи әтрапидики һәрбий маневириниң түнүгүн (20-сентәбир) му давамлашқанлиқини хәвәр қилди.
хәвәрдә, һәрбий қораллар ичидә танка көп салмақни игилигән вә нурғун әскәрләр қатнашқан һәрбий маневирда, қезилған бәзи нуқтиларниң кеңәйтилгәнлики билдүрүлди.
игилинишичә, колинип кеңәйтилгән бәзи нуқтиларға һәрбий әслиһәләр орунлаштурулған, әскәрләр үчүн чедирлар қурулған. «боран» намлиқ танкилар үчүн 155 лик зәмбирәк оқлириниң етишқа тәййар қилинған фотографлар таратқуларда тарқалған.
«вәтән гезити», түркийә сода мәркизиниң нийу йорктики шөбисини ечиш мурасиминиң бүгүн (21-сентәбир) өткүзүлидиғанлиқини хәвәр қилди.
гезитниң хәвиридә, «Empire State» бинасиға қошна болған шөбә мәркизиниң түркийә ширкәтлиригә американи чүшинишигә капаләтлик қилидиғанлиқи билдүрүлди.
түркийә иқтисад министири ниһат зәйбәкчи нийу йоркниң йуқири абруйға игә җайлиридин бири болған йәрдә ечилиш мурасими өткүзүлидиған түркийә сода мәркизиниң, експортчиларниң америка базириға киришидә муһим көврүклүк рол ойнайдиғанлиқини ейтқан.
«стар гезити», түркийәни өз ичигә алған ислам җуғрапийәсидики дөләтләрдики тонулған даңлиқ сәнәтчиләрниң қатнишиши билән өткүзүлидиған «14-нөвәтлик конйа музика фестивали» ниң мәвлана мәдәнийәт мәркизий султан вәләд залида 22-сентәбир башлинип 30-сентәбир ахирлишидиғанлиқини хәвәр қилди.
«хәбәртүрк гезити», йавропа путбол федератсийәлири бирләшмисиниң дөлитимиз вә бәшикташ командисини хушал қилидиған хәвәр елан қилғанлиқини билдүрди.
хәвәрдә, йавропа путбол федератсийәлири бирләшмиси кеңишиниң түнүгүн (20-сентәбир) нйонда ечилған йиғинда 2019-йиллиқ йавропа путбол федератсийәлири бирләшмисиниң дәриҗидин ташқири лоңқиси мусабиқилириниң Vodafone Park мәйданида өткүзүшниң қарарлаштурулғанлиқи билдүрүлди.
