07.08.2017

түркийә авази радийоси: «<хабәртүрк> гезити», «түркийә шәрқий җәнубий асийа дөләтлири иттипақиға шерик (болди)» сәрләвһилик хәвиридә төвәндики учурларни оқурмәнлири билән ортақлашти: «(түркийә ташқи ишлар министири мәвлут чавушоғлу, шәрқий җәнубий асийа дөләтлири иттипақиниң 50 – нөвәтлик йиғиниға иштирак қилиш үчүн барған филиппинда байанат берип , <түркийә шәрқий җәнубий асийа дөләтлири иттипақиниң саһәләр бойичә дийалог шерики болди. йол хәритимизгә йуқири баһа берилди. (буниңдин кейин) райондики дөләтләр билән болған һәм сийасий һәм органлар ара мунасивәтлиримиз техиму күчийиду. сода – санаәтчилиримиз үчүн, муһим пурсәтләр туғулиду> деди.»

«<сабаһ> гезити», «шәрқий җәнубта аҗайип өзгириш» сәрләвһилик хәвиридә төвәндики учурларни оқурмәнлири билән ортақлашти: «бөлгүнчи террорлуқ тәшкилати п к к ниң хәндәк вә тосуқлири билән еғир вәйранчилиққа дуч кәлгән дийарбакир, ширнақ, җизрә, силопи, нусайбин вә йүксәковада нөвәттә толуқ мәнидә мәбләғ селиш сәпәрвәрлики давам қилмақта. шәһәрлик һөкүмәтләрниң пуллири п к к ға әмәс, хәлқниң еһтийаҗлири үчүн сәрп қилинғачқа, вилайәт вә наһийәләр қисқа вақит ичидә заманиви көрүнүшкә игә болди. харабиликкә айланған шәһәрләрдики қурулушлар сайисида ичимлик вә керәксиз су үстқурулмилири йеңиланди, йоллар асфалитлаштурулди, йеңи мәктәпләр, дохтурханилар вә бағчилар йасалди.»

«<вәтән> гезити», «сода мәркизи әмәс, йәрмәнкә саһәси» сәрләвһилик хәвиридә төвәндики учурларни оқурмәнлири билән ортақлашти: «қатнаш, деңизчилиқ вә учур – алақә ишлири министири әһмәт арслан, истанбулдики үчинчи айродурумниң хизмәткә кириштүрүлүшидин кейин ататүрк айродуруминиң ақивитиниң қандақ болидиғанлиқи тоғрисида байанат бәрди. у, ататүрк айродуруми һәққидә тохтилип, <истанбулға нәпәс алдуриду. айродурум йәрмәнкә саһәси болиду. қурулуш иҗазити берилип сода мәркизи вә туралғу бәрпа қилиш мумкин әмәс> деди.»

«<һөррийәт> гезити», «өйгә қайтиш чариси» сәрләвһилик хәвиридә төвәндики учурларни оқурмәнлири билән ортақлашти: «фират қалқини һәрикити арқилиқ даештин халийлаштурулған әлбаб, җәраблус – азәзгә сүрийәлик пуқраларниң қайтишлири давам қилмақта. аилә вә иҗтимаий сийасәтләр министирлиқи билән б д т  мусапирлар алий комиссарлиқи мутәхәссислири, сүрийәгә қайтишни халайдиған айаллар, балилар вә аилиләргә писхик җәһәттә йардәм бәрмәктә. түркийәдә панаһланған 3 йерим милйон сүрийәликниң иҗтимаий җәһәттин маслишишини қолға кәлтүрүш хизмәтлириму давам қилмақта.»

«<йеңи шәпәқ> гезити», «даңлиқ шәхсләр түркийәдин ваз кәчмиди» сәрләвһилик хәвиридә төвәндики учурларни оқурмәнлири билән ортақлашти: «муғланиң бодрум наһийәси, түркийәни йахши көридиған чәт әллик сода санаәтчиләр, артислар, сийасәтчиләр, падишаһлар, сәнәтчиләр дегәндәк көплигән даңлиқ шәхсләрниң ваз кечилмәс җайлириниң бири болушни давамлаштурмақта. йеқинқи күнләрдә наһийәгә кәлгәнләрниң арисида шәхсий сайаһәт парахоти билән кәлгән украиналиқ сода – санаәтчи александр йарослависки, мексикилиқ сода – санаәтчи рикардо салинас пилиего, данийә хан җәмәти аилиси әзалири, әнглийәлик модел кате мос вә биразилийәлик модел адрийана лима қатарлиқлардин сирт сийасәтчиләр вә чәт әллик журналистларму бар. германийә билд гезитиниң сабиқ баш тәһрири каи диекманниңму сайаһәт қилиш үчүн бодрумға келиши диққәтни тартти.»