әзәрбәйҗан билән әрменийә пүтүшти

түркийә авази радийоси хәвири: русийә пирезиденти виладимир путин, әзәрбәйҗан пирезиденти илһам әлийев вә әрменийә баш министири никол пашинйанниң сочида ишқа ашурулған үч тәрәп башлиқлар учришишидин кейин қошма байаннамә елан қилинди.

әзәрбәйҗан – әрменийә чегра линийәлиридә муқимлиқ вә бихәтәрлик тәдбирлириниң күчәйтилиши мәсилисидә бирдәклик һасил қилинғанлиқи әскәртилгән байаннамәдә, әзәрбәйҗан билән әрменийәниң, чегра линийәлириниң бекитилиши үчүн икки тәрәплик бир комитет қуруш йолида қәдәм ташлаш мәсилисидә пүтүшкәнлики қәйт қилинди.

тәрәпләр тәләп қилған тәқдирдә, русийәниң йардәм беридиғанлиқи тәкитләнгән байаннамәдә, русийәниң әзәрбәйҗан билән әрменийә оттурисидики мунасивәтләрниң нормаллишиши, өзара инақ қошнидарчилиқ мунасивәтлириниң орнитилиши үчүн йардәм беришни давамлаштуридиғанлиқи, қарабағниң иқтисадий йошурун күчини ечишниң муһимлиқи, рәһбәрләрниң мәсилини имканийәтниң баричә әң қисқа вақит ичидә һәл қилиш үчүн ортақ тиришчанлиқ көрситишкә қошулғанлиқи билдүрүлди.

русийә пирезиденти виладимир путин, тәхминән 3 саәт давамлашқан учришиштин кейин, әзәрбәйҗан пирезиденти илһам әлийев вә әрменийә баш министири никол пашинйан билән бирликтә елан қилған байанатида, үч тәрәплик башлиқлар учришишиниң наһайити мувәппәқийәтлик өткәнликини  тәкитләп мундақ деди: «учришишта, биз муһим дәп қариған бәзи мәсилиләрдә бирдәклик һасил қилдуқ. бу нуқтилар мунуларни өз ичигә алиду: биринчиси, әзәрбәйҗан билән әрменийә оттурисида чегра линийәлириниң бекитип чиқилиши үчүн бу йилниң ахирлириғичә механизмларниң орнитилиши, иккинчиси, иқтисадий мунасивәтләрниң күчәйтилиши, болупму һәм төмүр йоллири һәм қуруқлуқ йоллири ақалисиниң ишқа кириштүрүлүши үчүн күчкә игә болидиған шәкилдә қатнаш каридорлириниң алдидики тосалғуларниң пачақлап ташлиниши, үчинчиси, әзәрбәйҗан вә әрменийә муавин баш министирлириниң келәр һәптә москвада бир йәргә җәм болуп, паалийәтлирини давамлаштуруши.»

әзәрбәйҗан пирезиденти илһам әлийев мундақ деди: «биз әзәрбәйҗан болуш сүпитимиз билән, узун йиллардин буйан давамлишиватқан тоқунушларға хатимә беришкә, мунасивәтләрни нормаллаштурушқа тәййармиз, бу форматсийәдиму нишанлиримизға йетәләймиз, дәп ойлаймән. шуни алаһидә тәкитләп өтимәнки, русийә әзәрбәйҗанниң достидур, истиратегийәлик һәмраһидур, һәтта истиратегийәлик һәмраһтинму муһим иттипақдишидур. русийә – әзәрбәйҗан оттурисидики ишәнч мунасивәтлири әрменийә билән болған әң сәзгүр мәсилиләрдиму бир чиқиш йоли тепишимизни қоллайлаштурмақта, учришишимизниң әң қисқа вақит ичидә муһим нәтиҗилири болиду, районниң вәзийити техиму тинч вә алдин мөлчәрлийәләйдиған вәзийәт шәкиллиниду, дәп ойлаймән.»

әрменийә баш министири никол пашинйан, учришишниң наһайити мувәппәқийәтлик өткәнликини әскәртип мундақ деди: «учришишта, күнтәртиптики барлиқ мәсилиләр һәққидә очуқ – ашкара музакирә елип бардуқ, бәзи мәсилиләрдә, тәхмин қилғинимиздәк чоңқур пикир ихтилаплириниң йоқлуқини көрдуқ, қарабағда иқтисадий вә қатнаш алақисини ишқа кириштүрүш тоғрисида ортақ көз қарашқа игимиз, әрменийә вә әрменийә хәлқи тәрипидин сайланған һөкүмитимизниң, зөрүр қәдәмләрни ташлаш арқилиқ тинчлиқ дәврини башлитишқа тәййар икәнликини билдүримән.»