өзбекистанда дөләт органлирида қоғлап чиқириш һәрикити башланди

түркийә авази радийоси хәвири: өзбекистан малийә министири җәмшид қучқаров, министирлиқниң охшаш болмиған бөлүмлиридә хизмәт қиливатқан 50 нәпәр йүқири дәриҗилик бийукратларни иштин қоғлап чиқарди.

бу қоғлап чиқириш өзбекистан пирезиденти шәвкәт мирзайивниң буйриқиға асасән болғанлиқи билдүрүлди.

өзбекистан пирезиденти шәвкәт мирзайив бир қанчә күн илгирики 4 саәтлик нутуқи җәрйанида, малийә министири қучқароврға, «әтрапиңдики һәммини қоғлап чиқар, уларниң орниға техиму йаш вә өзбкистанни шундақла өзбекистан хәлқини сөйидиған кишиләрни орунлаштурғин» дегәнлики илгири сүрүлди.

шуңа өзбекистан малийә министири қучқаровниңму қоғлап чиқиришқа мәҗбур болғанлиқи тәкитләнди.

шәвкәт мирзайевниң дөләтниң нурғунлиған органлирида, ислам кәримов дәвридин қалған, тәрса, һакими – мутләқлиқ характеригә игә мәмурларни қоғлап чиқиришни тәләп қиливатқанлиқи мәлум.

болупму 4 саәтлик нутуқида дөләт хәвписзлик мулазимитигә алақидар көрсәткән позитсийәси, бу җәһәттә қанчилик илгириләшни тәләп қилидиғанлиқини намайан қилған иди. 

давамлиқ дегүдәк «хәлқләр һөкүмәткә әмәс, һөкүмәтләр хәлққә хизмәт қилиши лазим» дегән сөзлирини тәкрарлап туридиған шәвкәт мирзайиев, дөләт органлирида иддийәви өзгириш елип беришни нишан қилмақта иди.

әркин йавропа радийосиға мәлумат бәргән, бирақ кимликини ашкарилашни халимиған бир қанчә нәпәр малийә министирлиқи хадимлири болса, һәммәйләнниң қаттиқ қоруқунчта икәнликини вә бу қоғлап чиқириш һәрикитиниң давамлишидиғанлиқини илгири сүрди.