исираилийә: иранниң һуҗумиға җаваб берилиду

түркийә авази радийоси хәвири: исираилийә армийәси баш иштаб башлиқи херзи халеви кан (KAN) телевизийәсиниң зийаритини қобул қилғанда, иранниң җиддий вәзийәтни улғайтиши билән ғәззәниң иккинчи орунға чүшүп қелишини халимайдиғанлиқлирини қәйт қилди.

у: «иран тунҗи қетим өз земини ичидин бивастә һуҗум қилғанлиқи үчүн агаһландуруш сизиқидин өтүп кәтти. буниңға җаваб қайтуруш керәк, дәп ойлаймән» деди.

у исираилийә һава армийәсиниң иранға қилинидиған һуҗум еһтимали үчүн тәййарлиқларни ахирлаштурғанлиқини әскәртти, әмма һуҗумниң қайси шәкилдә болидиғанлиқи тоғрисида мәлумат бәрмиди.

у иранға қарши сүйиқәст һәрикәтлири йаки кәң көләмлик тор һуҗумлири қилиниши мумкинликиниму рәт қилмиди.

исираилийә армийәсиниң йазма байанатиға асасланғанда, херзи халеви иранниң 13-апрелдики (2024) һуҗумида чоң бузғунчилиққа учримиған неватим һава армийә базисини зийарәт қилғанда: «алдимизға қараймиз, ташлайдиған қәдәмлиримиз үстидә ойлинимиз, бунчивала көп башқурулидиған бомба вә учқуларниң исираилийә земиниға қаритип қойуп берилишиниң бир җаваби болиду» дегән.

исираилийә 1-апрел (2024) иранниң сүрийә пайтәхти дәмәшиқтики әлчихана бинасини бомбардиман қилип, йәттә иранлиқни өлтүргән иди. буларниң ичидә иран инқилабий муһапизәтчиләр қисминиң икки генерали бар иди.

иран буниң дөләт земиниға һуҗум қилғанлиқ болидиғанлиқини вә өч алидиғанлиқини елан қилған иди. исираилийә болса, иранниң һуҗумлириға җаваб қайтуридиғанлиқини билдүргән иди.

иран 13-апрел кечидә исираилийәгә қаритип йүзләрчә учқу вә онларчә башқурулидиған бомба қойуп бәрди. нәтиҗидә, исираилийәниң бәзи һәрбий базилириға башқурулидиған бомба чүшкәнлики қәйт қилинди.

исираилийә учқу вә башқурулидиған бомбиларниң көпинчисиниң һава қалқан системиси тәрипидин тосувелинғанлиқини, җәнубтики һәрбий базиға бир башқурулидиған бомба чүшкәнликини уқтурди.