б д т баш катипи: инсанпәрвәрлик йардәм буйумлириниң ғәззәгә киришигә йол қойулуши керәк
бирләшкән дөләтләр тәшкилати баш катипи антонийо гутеррес йеқилғу, йемәклик вә су қатарлиқ муһим инсанпәрвәрлик йардәм буйумлириниң ғәззәгә киришигә йол қойулуши лазимлиқини ейтти.
түркийә авази радийоси хәвири: баш катип антонийо гутеррес америка қошма иштатлириниң нйу йорк шәһиридики бирләшкән дөләтләр тәшкилати бинасида исраилийә-пәләстин тоқунуши тоғрисида байанат елан қилди.
гутеррес байанатида, исраилийә вә ғәззәдики өзгиришләрни йеқиндин көзитип келиватқанлиқини, район рәһбәрлири биләнму қойуқ алақә орнитиватқанлиқини тәкитләп мундақ деди:
«тоқунушниң даирисиниң техиму кеңийип кетишидин сақлинишимиз керәк. ливан - исраилийә оттурисидики <көк линийә> дәп бекитилгән чегра линийәсидин (қарши тәрәпкә) өзара оқ чиқирилиши вә ливанниң җәнубидин елип берилған һуҗумлар сәвәбидин районниң вәзийитиниң техиму йаманлишип кетишидин қаттиқ әндишә қиливатимән.»
баш катип гутеррес һәрқайси тәрәпләрни вә вә уларни контрол қиливатқан күчләрни җиддийчиликниң техиму күчийип кетиши вә даирисиниң техиму кеңийип кетишиниң алдини елишқа чақирип мундақ деди:
«ғәззәдә тутулуватқан барлиқ исраилийәлик тутқунларниң дәрһал қойуп берилишини тәләп қилимән.»
гутеррес пуқраларни қоғдаш вә хәлқара инсанпәрвәрлик қануниға һөрмәт қилиш керәкликини тәкитлиди.
у йүзмиңлиған пәләстинликниң бирләшкән дөләтләр тәшкилатиниң ғәззәдики 92 мусапирларға йардәм бериш орнида панаһлиниватқанлиқини, дохтурханилар вә мәктәпләрниң һәргиз нишанға елинмаслиқи керәкликини тәкитләп мундақ деди:
«йеқилғу, йемәклик вә су қатарлиқ муһим инсанпәрвәрлик йардәм буйумлириниң ғәззәгә киришигә йол қойулуши лазим. биз һазир наһайити тез вә тосалғусиз инсанпәрвәрликкә моһтаҗмиз.»
гутеррес мисирниң рәфаһ чегра еғизи арқилиқ инсанпәрвәрлик ишлириға қолайлиқ йаритип бериши вә әләриш айродурумини инсанпәрвәрлик йардәм хизмитигә тәййарлиши түпәйли мисирға миннәтдарлиқ билдүрди.
б д т баш катипи сөзиниң ахирида мундақ деди:
«вақтимиз интайин қис, һәтта һәр бир минутму наһайити муһим.»
һамасниң һәрбий қанити болған қассам биригадилири шәнбә (7-өктәбир) күни исраилийәгә «әқса топани» намлиқ кәң көләмлик һуҗум қозғиғанлиқлирини елан қилғаниди. ғәззәдин исраилийәгә миңлиған ракетамийот етилған, қораллиқ гуруппиларму райондики олтурақ районларға киргәниди.
исраилийә армийәси болса, уруш айропиланлири билән ғәззә шәһиригә «төмүр қилич һәрикити» қозғиғанлиқлирини билдүргәниди.
игилинишичә, барғансери кәскинлишиватқан тоқунушларда һәр икки тәрәптин йүзлигән киши җенидин айрилған.
