ливийәниң дәрнә шәһиридә кәлкүн апитидә өлгәнләр сани 6 миңдин ешип кәтти
ливийәниң шәрқидики дәрнә шәһиридә кәлкүн апитидә қаза қилғанларниң сани 6 миңдин ешип кәтти, миңлиған киши йоқап кәтти.
түркийә авази радийоси хәвири: ливийә рәсмий хәвәр агентлиқи «LANA» ниң хәвиригә қариғанда, 10-сентәбир күни йүз бәргән кәлкүн апитидә пәқәт дәрнә шәһиридә қаза қилғанларниң санила 6 миңдин ешип кәткән.
ақдеңизға тәсир көрсәткән вә 10-сентәбир күни ливийәниң шәрқигә еғит талапәт йәткүзгән «данийал» намлиқ боран - чапқун бинғази, бәйза, мәрҗ, сусә вә дәрнә шәһәрлиридә кәлкүн апитини кәлтүрүп чиқарғаниди.
ливийә миллий бирлик һөкүмитиниң баш министири абдулһәмид дибәйбә кәлкүн апити сәвәбидин пүтүн мәмликәттә 3 күнлүк матәм елан қилған, ливийә пирезидент кеңишиму қериндаш дөләтләр вә хәлқаралиқ тәшкилатларни кәлкүн апитидә талапәткә учриған районларға йардәм беришкә чақирғаниди.
хәлқара қизил кирест җәмийити ливийәдики кәлкүн апитидә йоқап кәткәнләр саниниң 10 миңға йәткәнликини уқтурғаниди.
игилинишичә, ливийәниң шәрқий районлиридики һөл-йеғин миқдари «40 йилдин буйанқи әң йуқири сәвийә» гә йәткән.
