вотел, й п г / п к к ниң америкидин сүрийәдин әскәр чекиндүрмәсликни тәләп қилғанлиқини ейтти

түркийә авази радийоси хәвири: америка армийәси мәркизий қоманданлиқ иштабиниң қомандани җосеф вотел, сурийә демократик күчлири дегән исимни ишлитиватқан бөлгүнчи террорлуқ тәшкилати й п г / п к к ниң, өзлиридин сүрийәдин чекинмәсликни тәләп қилғанлиқини, бирақ буниң нөвәттики әһвалда бир хил таллаш әмәсликини ейтти.

америка таратқулириниң хәвәр қилишичә, америка армийәси мәркизий қоманданлиқ иштабиниң қомандани генерал - полковник җосеф вотел, түркийә тәрипидин тутуш буйруқи чиқирилған, америка башчилиқидики даешқа қарши хәлқара иттипақдаш күчләр  тәрипидин <сурийә демократик күчлири> ниң қомандани дәп қариливатқан п к к террорчиси мазлум кобани тәхәллуслуқ шаһин җило билән америкиниң сүрийәдики бир һәрбий базисида көрүшти.

п к к террорчиси җило, америкидин һава вә қуруқлуқта йардәм беридиған запас күч тәләп қилидиғанлиқини билдүрди.

җосиф вотел җило билән көрүшкәндин кейин мухбирларға байанат берип, «улар биздин қилишимизни тәләп қилған ишларни әлвәттә билимиз. бирақ, бу нөвәттә биз меңиватқан бир йол әмәс» деди.

вотел, америкиниң сүрийәдә әскәр қалдуруп қойуп – қоймайдиғанлиқи тоғрисидики бир соалға җаваб берип, «дәталаш америка әскәрлириниң бу йәрдә қелиш – қалмаслиқи тоғрисида әмәс. иттипақдаш күчләр немиләрни қилалайду, униңға қарап чиқтуқ» деди.

у йәнә, америка пирезиденти доналд трампниң декабир ейидики чекинишкә алақидар йолйоруқини иҗра қиливатқанлиқлирини сөзлиригә илавә қилди.