җәнубий корейә америка әскәрлиригә техиму көп расхот аҗратти
җәнубий корейә билән америка оттурисида һасил қилинған келишимгә асасән, җәнубий корейәдики америка әскәрлиригә аҗритилған чиқимниң миқдари өстүрүлди.
түркийә авази радийоси хәвири: җәнубий корейә һөкүмити җәнубий корейәдики америка әскәрлириниң чиқимини америка һөкүмити билән һасил қилған келишимгә асасән ашурғанлиқини билдүрди.
келишим бойичә, җәнубий корейә һөкүмити җәнубий корейәдики америка әскәрлиригә аҗратқан расхот миқдарини 890 милйон долларға чиқарди.
американиң җәнубий корейәдики 28500 әскириниң чиқимини ашурушни мәзмун қилған келишимниң инавәтлик муддити 5 йилдин 1 йилға төвәнлитилди.
келишимниң муддити ахирлашқанда америка һөкүмити билән җәнубий корейә һөкүмити келишим үстидә қайтидин музакирә өткүзиду.
пайтәхт сеулда келишим имзалиништин илгири байанат бәргән җәнубий корейә ташқи ишлар министири каң кийуң ва: бу мәсилидә узундин буйан сөһбәт өткүзүп келиватқанидуқ, ахири келишим һасил қилдуқ, деди.
министир каң кийуң ва, мәзкур келишим тоғрулуқ пәйда болған наразилиқларниң әксичә, келишимниң иҗабий қәдәм болғанлиқини билдүрди.
бултур март ейидин буйан икки тәрәп келишим имзалаш үчүн 10қетим музакирә өткүзди.
америка даирилири җәнубий корейә һөкүмитиниң америка әскәрлириниң чиқими үчүн һәр йили 1 милйард 200 милйон доллар беришини тәләп қилип келивататти.
америка пирезиденти доналд трамп бултур ийулда җәнубий корейәдики америка әскәрлириниң чиқими вә райондики һәрбий маневирлар үчүн зор чиқим сәрп қилинғанлиқини билдүрүп, һәрбий маневирларниң тохтитилидиғанлиқини ейтқаниди.
доналд трампниң йолйуруқиға бинаән, америка мудапиә министирлиқи-пентагон корейә йерим арилида кәң көләмлик һәрбий маневир өткүзүшни тохтитивәткәниди.
доналд трамп йәнә икки дөләт оттурисидики әркин сода келишимини бикар қиливетидиғанлиқини билдүрүп җәнубий корейәгә тәһдит салғаниди.
